Door di incorpora e historia di sclavitud den curiculo di scol y como parti di programanan educativo pafo di scol, nos ta siña conoce e pasado y alabes siña conoce nos mes mas miho.
Diaranson mainta, durante Conferencia di Prensa di Gobierno di Aruba a lansa oficialmente e campaña di conscientisacion di sclavitud na Aruba. Minister di Enseñansa y Deporte Endy Croes a hiba palabra riba e historia y abolicion di sclavitud na Aruba. E dignatario a subraya cu den pueblo e ta un tema ainda relativamente desconoci.
Pero, ta yene cu satisfaccion pa mira cu e topico di sclavitud poco poco ta hayando mas y mas atencion y interes. Minister Endy Croes a uni den proyecto aki hunto colega Minister di Finansas y Cultura Xiomara Maduro, pa trece mas claridad riba e aspecto importante aki di nos historia. ‘Mi tambe ta uni na e pensamento cu ta esencial y importante pa nos ta na altura di nos pasado’, Minister Endy Croes a expresa.
Mandatario di Enseñansa a indica cu pa realisa esaki, ta hopi importante pa e historia di sclavitud haya su luga y reconocemento den nos educacion formal na scolnan, pero tambe den educacion informal cu ta encera programanan educativo pafo di scol, entre otro, social media. Door di incorpora e historia di sclavitud den curiculo di scol y como parti di programanan educativo pafo di scol, nos ta siña conoce e pasado y alabes siña conoce nos mes mas miho.
E conocemento aki ta contribui no solamente na un miho comprension di e desaroyo di nos comunidad, pero tambe e ta yuda nos compronde nos propio pasado miho. Loke cu ta haci e proceso di descubrimento uno interesante, ta cu danki na medionan innovativo, awo mas cu nunca, ta facil pa haya acceso na documentonan historico relata na e topico di sclavitud. E coleccion, ta disponibel digital y ta accesibel riba coleccion.aw, loke ta hacie mas facil pa studiantenan cu kier skirbi un proyecto tocante di e topico aki por yega mesora na informacionnan necesario. Tambe, por acudi na Archivo Nacional pa haci un investigacion di “stamboom” y na e manera aki mira e conexion entre laso familiar y nos pasado di sclavitud. Sin duda, e informacion aki por wordo pasa pa nos futuro generacion. Tin materialnan educativo existente cu lo wordo revisa y imprimi di nobo. Actualmente, esaki ta den proceso y pronto nos lo tin e materialnan educativo aki disponibel pa scolnan basico y secundario.
Minister Endy Croes a indica cu e producion di e materialnan educativo aki, ta den man di nos propio profesionalnan den enseñansa na Aruba y e parti financiero pa esaki lo keda cubri cu e sosten di Hulanda.
Minister Endy Croes a enfatisa cu e ta sostene e proyecto di colega Minister Xiomara Maduro y ta duna cooperacion total pa e topico aki haya su debido atencion na scolnan. Mandatario di Enseñansa a finalisa, bisando cu conscientisacion y educacion ta bay man den man. ‘Laga nos cada un siña mas tocante di un parti di nos historia y na e manera aki gradici nos antecesornan pa nan lucha y contribucion. Laga nos cada un aprecia y balora nos pasado, siña lesnan valioso, y cu e sabiduria adkiri nos por sinti nos orguyoso di nos herencia historico’, Minister Endy Croes a finalisa.
