Recientemente, Minister di Enseñansa y Deporte Endy Croes a reuni cu Sra. Anne-Marie Proveyer, directora di Departamento di Enseñansa y Sra. Indra Zaandam, gerente di Programa Tijdelijke Werkorganisatie Aruba (TWO-AUA).
Sra. Zaandam ta e persona cu ta atende cu “Landspakket” pa tur minister na Aruba. Durante e reunion Sra. Zaandam a duna un splicacion amplio di e forma cu mester sigui traha awo cu a reemplasa COHO cu un convenio nobo, esta Onderlinge Regeling.
Den e Onderlinge Regeling tin un “werkwijze reglement” y a base di esaki a reuni cu Sra. Zaandam pa compronde bon e sistema nobo cu lo sigui traha cune, entre otro, ora tin un Plan van Aanpak, ora e proyecto mester subi Uitvoeringsagenda, ki ora mester mand’e Hulanda, ki ora mester hay’e bek pa bay ministerraad y pa finalmente wordo aproba.
Tambe, a dialoga brevemente riba e proyectonan cu ya ta andando, entre otro, Proyecto di Data, Proyecto di Ley, Proyecto di Financiamento di Schoolbestuur y Proyecto di Maneho di Idioma. Tur esaki ta proyectonan cu a ehecuta a base di e recomendacionnan di Doorlichtingsrapport. Fuera di esaki, a haci cierto palabracion hopi cla cu otro.
Tin varios “deadlines” cu mester cumpli cu ne, pues a haci palabracion pa keda alinia cu otro y pa cumpli cu e fechanan stipula. Finalmente, a dialoga tocante e relacion di 4 Landen Overleg di Ministerio di Enseñansa, Cultura y Ciencia y pa ta alinia cu topiconan cu ta trata durante e reunionnan entre e 4 paisnan di Reino Hulandes. Un reunion extenso, unda cu a haci palabracion cla y concreto.
