(ORANJESTAD)— Diabierna atardi, Minister Endy Croes a emiti informacion extraordinario unda a informa di e situacion di e seis alumnonan di SPO.
Mandatario di Enseñansa a indica cu na comienso di e aña aki a yega na su conocemento cu mayornan ta preocupa cu nan yiunan cu por continua di SPO pa SEPB na januari 2023, a wordo notifica door di SEPB cu no tin cupo pa nan. Manera cu Mandatario di Enseñansa a tuma nota di esaki y pa esunnan cu conoce maneho di e dignatario cual ta busca solucion inmediatamente, Minister Endy Croes a solicita un reunion, cual a tuma luga siman pasa.
A invita e ekipo di maneho di SEPB, dirigente di SEPB, DPS, Departamento di Enseñansa, OAA, Inspectie Onderwijs hunto cu conseheronan di enseñansa pa busca mas informacion y un solucion. Mandatario di Enseñansa a agrega cu a wordo informa cu desde 2016 tin un acuerdo entre SPO y SEPB, pero tambe tin un “richtlijn” un otro acuerdo entre SEPB y sindicato unda cu por ehempel no mag di habri klas cu mas di 20 alumno pa motibo di siguridad.
Minister Endy Croes a haci extra esfuerso unda a pidi tur e profesionalnan pa haci hunto nan huiswerk na tur dos EPB tanto na San Nicolas y Playa pa mira na unda y con por soluciona temporalmente e situacion aki, kisas por medio di un excepcion pa e seis alumnonan aki por haya un cupo na scol.
Minister Endy Croes a indica cu a haya un bon noticia di SEPB cu na San Nicolas seis cupo a habri unda cu diabierna atardi a informa e mayornan. Awor ta keda na e mayornan pa permiti pa nan yiunan continua cu nan scol na SEPB San Nicolas. Minister Endy Croes a informa cu a lanta dos comision: uno cu ta encarga di revisa e acuerdo di 2016 cu tur e stakeholders envolvi y e otro cu ta wordo lidera pa Departmento di Enseñansa pa wak e “richtlijnen” y hunto cu sindicato pa hinca un clausula bou peticion di Minister Endy Croes di excepcion pa dado caso den futuro un situacion asina presenta por tin espacio pa acomoda e alumnonan.
Minister Endy Croes a scucha e problema na inicio di aña 2023. E mandatario a tuma accion, a nota preocupacion den prensa di diferente mayor y a soluciona e problema. Ta keda awor na e mayornan pa inscribi nan yiu na SEPB San Nicolas pa asina e alumnonan por continua cu nan estudio.
