Diahuebs ultimo, Minister Endy Croes a reuni cu directora di De Schakel Sra. Inge La Haye y miembro di directiva Sr. Sudesh Manichand. De Schakel a haci peticion pa expansion di e scol.
Esaki ta den plan di e scol pa basta tempo caba. Gobierno di Aruba mester tene na cuenta e condicionnan den Landspakket y e exigencia di CAFT pa corta primordialmente den “goederen en diensten”. Alabes ta trahando riba un plan van aanpak pa e 13 recomendacionnan di e Doorlichtingsrapport. Minister Endy Croes a pidi un poco mas espacio pa esaki.
A traves di Universidad di Aruba ta bay haci un estudio den e proximo lunanan pa trece dilanti e cantidad di alumnonan cu tin na Aruba y e cantidad di lokaal cu tin disponibel na Aruba actualmente den contexto. A base di e estudio aki, yega na un conclusion si tin espacio pa por expande mas scol na Aruba. Den futuro cercano ora cu gobierno ricibi e rapport final por continua cu e discusionnan di posibel expansion di e scolnan.
Tin varios peticion pa traha mas edificio di scol. Na e momento aki, gobierno no por a yega na un compromiso ainda.
Concluyendo, Minister Endy Croes a enfatisa cu e tabata un reunion interesante y ta gradici directora di De Schakel Sra. Inge La Haye pa tur conseho y tips hopi valioso riba e tematica di enseñansa en general. Minister Endy Croes a enfatisa cu Sra. La Haye tin un pasion enorme pa enseñansa y ta aplaudi esey. Hunto lo sigui traha di cerca cu tur schoolbestuur pa trece e miho solucionnan pa enseñansa di Aruba den su totalidad.
