(ORANJESTAD) — Diaranson mainta, Minister Endy Croes a reuni cu Comision di Maneho di Idioma Sra. Vanessa Scholing-Pietersz (presidente), Sra. Audrey Tromp-Wouters y Sr. Juan Maduro. Presente tambe na e reunion tabata directora di enseñansa, Sra. Anne Marie Proveyer-Groot y consehero di enseñansa, Sra. Swinda Winterdaal.
Prome cu e inspectornan di enseñansa di Hulanda y di Aruba a produci e rapport final di Doorlichting van het Arubaanse Onderwijsbestel na november di aña 2022, a desaroya un Tussenrapportage Doorlichting na januari di 2022 cu diestres (13) recomendacion pa mehora e calidad di enseñansa di Aruba.
Recomendacion number dos (2) ta indica unda tin e necesidad actual; esta un escogencia cla y consecuente pa maneho di idioma den e sistema di enseñansa di Aruba. Di acuerdo cu recomendacion number dos (2) di e Tussenrapportage Doorlichting a institui na luna di maart di aña 2022 un comision di profesional cu tabatin e tarea pa haci investigacion durante e lunanan di april te cu december di aña 2022. E comision a reuni cu entre otro “stakeholders”, directivanan di scol, veld di enseñansa, alumno y docentenan, organisacionnan pafo di enseñansa, comision fiho di Enseñansa di Parlamento di Aruba.
Como tambe a organisa diferente anochi di informacion den diferente districto pa asina tambe scucha opinion di comunidad. Basa riba e trayecto aki e comision a desaroya un tussenrapport den e luna di december di aña 2022. Na final di februari 2023 ta entrega e rapport final. Durante e reunion Comision di Maneho di Idioma a duna un presentacion bastante amplio di e tussenrapport, cual tambe lo wordo presenta na Parlamento di Aruba. Despues cu e rapport final ta cla, Minister Endy Croes ta planifica pa tuma un decision prome cu 31 di maart di aña 2023 tocante e maneho di idioma den enseñansa di Aruba. A base di nota di diferente profesor di Hulanda, ta proba cu tin mas di 200 aña cu ta papiando riba e tema aki, pues finalmente ta bay tuma un decision concreto di maneho di idioma den enseñansa na Aruba.
Esaki por trece cambio grandi pa pais Aruba, entre otro consecuencia financiero y cambio di algun ley. Tambe, mester prepara e docentenan pa e implementacion di e sistema aki. Despues di determina ki direccion ta bay tuma pa e maneho di idioma den enseñansa, mester traha un plan di varios aña y ehecuta esaki den diferente fase.
