Diaranson merdia Minister di Enseñansa, sr. Endy Croes a ricibi Rector di Universidad di Aruba, dr. Viola Heutger y Presidente suplente di Colegio di Supervision di e instituto, drs. Angelo Brete pa dialoga riba algun prioridad di e instituto y di e ministerio di enseñansa. Ademas a reuni cu sr. Ryan Maduro Director General di EPI y sra. Claudia Whitfiels Director Onderwijs EPI.
Sr. Brete a introduci e rector nobo di Universidad y a duna un splicacion breve di e structura di e instituto y e rol cu Minister di Enseñansa tin den esaki, cu ta regla den e Ordenansa di Universidad di Aruba (LUA). Dr. Heutger a duna Minister Croes un splicacion amplio di varios proyecto y logronan di Universidad di Aruba.
Segun un comunicado di gobierno, a elabora riba e actividadnan mas nobo di e facultad cu ta wordo financia cu fondonan di Union Europeo, e programa cu ta hiba e nomber Sisstem. Croes tabata contento di tende cu den e cuadro aki, tin varios miembro di e staff academico di Universidad ta trahando pa obtene nan doctorado (Phd). Rector di Universidad a agrega cu tur programa cu e instituto ta ofrece ta acredita y cu tin hopi interes pa Universidad ofrece mas programa riba nivel di ‘Master’.
Rector Heutger a entrega dos reporte anual (2019 y 2020) di Universidad di Aruba cu ta contene informacion financiero di e instituto y tambe estadistica di e cantidad di studiantenan cu ta studia y a gradua na e 4 facultadnan. Rector di Universidad di Aruba a expresa su boluntad pa duna Gobierno di Aruba conseho ora ta necesario riba conceptonan di ley, como tambe riba cuestionnan di maneho di por ehempel idioma y bienestar di nos hobennan.
Croes a duna di conoce cu un di su metanan ta pa inspira instancianan cu tin un rol den maneho di enseñansa na Aruba, pa entre nan, construi brugnan solido pa asina evita fragmentacion mas tanto posibel. E reunion a bay den un atmosfera ameno.
Reunion cu EPI
Croes a scucha cu atencion tur puntonan cu a keda treci dilanti y prioridadnan pa cu e tereno di enseñansa. E reunion tabata uno hopi ameno y fructifero. Sr. Ryan Maduro a expresa cu e ta hopi contento con e reunion a bay, e tin un bon sentimento y e ta contento cu un minister cu ta dispuesto pa traha pa enseñansa, segun e comunicado.
Croes a priminti di scucha, analisa y bin cu un maneho pa reestablece trankilidad y paz bek den enseñansa y pa logra esaki lo traha cu portanan habri pa scucha tur “stakeholders” pa e bienestar general.
