Recientemente, Minister Endy Croes a reuni cu sr. Gilberth Wernet di Departamento di Recurso Humano (DRH) y ekipo di maneho di Instituto Biba Saludabel y Activo (IBISA). A dialoga profundamente tocante IBISA entre otro, diferente vacatura habri cu mester wordo ocupa. Ta trata di vacatura interno, unda cu empleadonan di IBISA mes por solicita pa e posicionnan aki.
A pidi conseho di DRH riba e topico, pa asina por soluciona e asunto aki efectivamente. Tambe, a pidi cooperacion di DRH pa tur vacatura wordo yena dentro di 4 pa 6 siman, pa di e forma aki e departamento por funciona di un forma mas eficiente. Durante e reunion a dialoga brevemente tocante e structura di IBISA, si Directie Volksgezondheid (DVG) lo sigui forma parti di IBISA.
Banda di esaki, Minister Endy Croes y sr. Wernet a sigui trata otro topiconan, entre otro e instructornan di sport cu pa varios aña caba ta traha riba “losse uren”. A debati tocante esaki pa hunto sondea un solucion pa e grupo aki. Finalmente, a dialoga tocante e sosten di DRH pa cu Dienst Publieke Scholen (DPS) den e parti di restructuracion y mehoracion di DSP.
