Ayera mainta durante un conferencia di prensa extraordinario Minister di Deporte y Enseñansa, Endy Croes, a anuncia e firma di un contract nobo entre Lotto pa Deporte y Canadian Bank Note (CBN) pa loke ta maneho di Lotto pa Deporte.

Durante e conferencia, Minister Croes a recorda cu na 1982 Lotto pa Deporte a wordo funda cu e idea cu Lotto lo genera fondo pa deporte pa motibo cu desde e tempo ey caba gobierno tabatin e problema di fondo cu ta destina directamente pa deporte.

Na september 2021, Croes a tuma over Lotto pa Deporte y e tabatin e deseo, y Minister Dangui Oduber, como Minister di Deporte anterior tambe tabatin e deseo pa negosha un miho contract pa Aruba y su deporte.

“Nos tabatin e sentimento cu e fondonan di Lotto no tabata bay su destino manera cu mester ta. Nos tabatin e sentimento y nos a prueba esaki tambe cu rapportnan riba mesa cu un gran parti di e fondonan ta bay otro destino. Mas cu claro tur negoshi cu firma un contract tin derecho pa haci negoshi, pero e placa di Lotto mester keda destina pa e deportista,” Croes a remarca.

El a splica cu a bay back den ley di 1902 di loterianan caminda ta indica cu e legitimidad social mester wordo sirbi y den e ley e tempo ey caba e pensamento tabata cu loteria ta pa sirbi un bon causa na un pais y no solamente un grupo of compania haya e parti mas grandi.

Gobierno di Aruba a tuma contacto cu CBN y a cuminsa cana e caminda pa e negociacion di un contact nobo. E punto di bista di gobierno tabata cu e unico manera cu lo sinta na mesa y dialoga ta si tin e tema di negociacion di un contract nobo na beneficio di Lotto di Aruba y di e deportistanan.

CBN a bay di acuerdo pa bin Aruba y cuminsa e combersacionnan. Na luna di juli a reuni cu e Canadian Bank Note y Lotto pa Deporte y su conseheronan y a yega na un MoU (Memorandum of Understanding) den e cuadro cu lo renegosha un contract nobo. E tempo ey a bisa cu den 90 dia lo tin un contract nobo, pero esaki no a sucede den 90 dia.

Den e cuadro di renegociacion tabatin un punto hopi importante. Desde 2011, momento cu e directiva di turno a dicidi pa traspasa e operacion di Lotto pa Deporte completamente pa Canada y a lanta un CBN Aruba cu tabata opera na Aruba, pero bao maneho di CBN na Canada, Lotto pa Deporte, cu tabata esun cu tabatin e permiso, a keda sin nada y esaki tabata bay contra e leynan di loteria.

Minister Croes a remarca cu for di 1999 pa 2011, semper Canada tabatin un contract cu Lotto caminda nan tabatin un management fee di 8.25%, esaki kiermen nan tabata ricibi un porcentahe di 8.25% di e bentanan total di Lotto. Na 2011 cu e cambio di e contract, e management fee a pasa di 8.25% pa 23.5%.

“Esey ta e inhusticia cu nos a bringa, esey ta e inhusticia cu nos a para pe cu nos a bisa no. E deporte no ta wordo sirbi den su totalidad cu un contract asina y ora nos a trece riba mesa. Di aña 2011 pa 2020, den e contract nobo den e añanan ey, CBN y CBNA a haya 104 miyon florin, y e subsidie comissie, Stichting Subsidie, a haya 34 miyon. Esey nos kier a drecha pa federacionnan di deporte na Aruba por cuminsa haya mas entrada,” el a subraya.

Den luna di februari CBN y Lotto pa Deporte a firma contract nobo y a bolter e contract caminda e management fee di 23.5% cu tabata bay pa CBN y CBNA, aworaki a bay back na 8.25%, y cu esaki e operacion di Lotto pa Deporte lo pasa pa back pa Aruba. Den lunanan dilanti lo cuminsa cu e proceso di traspaso entre CBN, CBNA y Lotto pa Deporte.

“Contract ta firma y aworaki lo cuminsa cana cu e parti legal unda Lotto pa Deporte lo tuma e assetnan back. Dentro di algun luna Lotto pa Deporte cu su director lo ta esun cu ta encarga cu Lotto pa Deporte,” Croes a agrega.

El a enfatisa cu e negociacionnan pa e contract nobo no tabata facil pa motibo di diferente aspecto. Entre otro e contract legitimo cu tabata firma cu tabata valido te 2031. Tambe Na 2009 Parlamento di Aruba a aproba un prestamo di 17 miyon florin pa construi tres parke. E tempo ey a bisa cu pa 10 aña largo lo haya esaki sin interes y cu lo mester cuminsa paga na 2020. Esey tabata un obstaculo den e negociacion tambe.

Minister Croes a sigui splica cu diferente rapportnan a indica cu di 2011 pa 2020, e equidad di Lotto pa Deporte cu tabata 10 miyon, durante e añanan el a baha yega na -6 miyon.

Pero cu e construccion nobo aki, el a señala, y cooperacion di e entidadnan concerni e contract nobo a wordo firma. “Nos ta kere esaki ta e caminda y e trayecto husto cu nos a logra,” el a agrega.

Por ultimo Croes a indica cu durante aña aki caba lo por tuma nota di algun cambio chikito, pero den añanan cu ta bin, aki tres pa cinco aña, deporte lo ricibi un parti mas grandi cu loke e ta hayando aworaki.