Ayera mainta minister encarga cu Turismo Otmar Oduber a tene un conferencia di prensa unda cu el a splica tocante e trabounan y kioskonan riba beach.
El a inicia splicando di ta lamenta comentarionan di oposicion cu ta indica cu ta dañando e beachnan. El a bisa cu tin un plan van aanpak completo traha for di comienso pa nos beachnan. Y ta consciente cu aworaki tin presion enorme. “Aruba a crece den un forma masha grandi cu awe ta ricibi casi 700 mil bishitante for di barconan crucero cual tur ta bay den e area di hotel pasobra nan kier e facilidadnan di baño, facilidad di por tuma un douche, di por come of bebe algo. Y netamente door di e presion ey cu ta wordo crea den hotel combina cu e beach policy cual ya a cuminsa cun’e y pa prome di juli e mester ta ful na vigor den su ehecucion, a bay over tambe na e plan pa crea den diferente area unda cu ta acumula tour busnan y esunnan cu ta piki e turistanan di barconan crucero y hiba nan un otro sitio pa no crea e aglomeracion cu ta haya rond di hotelnan. Mescos a mira y a haya hopi elogio pa loke ta Arashi unda cu un di e kioskonan a wordo traha y elogia como cu a prepara esakinan bon y a percura pa nan ta di un bon calidad.”
Kiosko di beton
Hopi ta puntra pakico esakinan ta wordo traha di beton, pa cual e mandatario a splica cu ta pasobra cu ora cu ta papia i mantencion di beachnan, e mester wordo haci di tal forma cu e mantencion ta facil. Y cu naturalmente e por contra cu salpeter como cu ta gobierno ta esun cu lo mester mantene esakinan tambe. Asina pues a scoge a uniformidad entre tur, esun na Arashi, esun na Nicki Beach y e dosnan na Eagle Beach. Esakinan ta forma e prome 4 nan cu lo wordo uza den e forma ey pa distribui e turistanan mas hopi cu ta posibel cu ta prefera pa no bay riba un tour of shop den caya grandi, pero cu kier disfruta di nos beachnan, Sr. Oduber a splica.
Pa loke ta comentarionan di e material uza, den e caso aki beton, a puntra Sr. Oduber si esaki no ta malo pa nos beachnan. El a bisa den e caso aki DOW ta esun envolvi cu a haci investigacion y ta scoge sitionan. A traves di fondonan di TPF of ATA ta paga pa e solucion cu kier trece na e beachnan pa tin mas siguridad y bista pa tur esunnan cu ta haci uzo di e beachnan. Y ta p’esey mes kier kita e volumen halto y aglomeracion di hopi hende cu tin rond di hotelnan. Sr. Oduber a mustra cu e kioskonan no ta traha riba beach sino den area unda cu autonan sa para y cu ora tin campamento hendenan sa campa pues no tin ningun destruccion di beach tumando luga. “Al contrario, e motibo di pone e tipo di kioskonan aki y ora cu bo bay na esunnan cu ya ta cla, ta mira cu el a hisa calidad di e beach. Y ta crea facilidad pa hende no bay tira cos afo unda cu ta y tin espacio di baño y douche tambe pa hende uza cual ta ful un sistema organisa,” el a termina bisando.
