Prome Minister Mike Eman no tin duda cu pais Aruba lo cumpli cu e meta cu su gobierno a propone di bira un isla auto sostenibel riba energia alternativo pa aña 2020. Esaki a pesar cu e lider di e team MAPS di e programa di energia di UNDP di Nacionnan Uni, Marcel Alers a declara na Bon Dia Aruba, cu aunke Aruba ta riba un bon caminda, ainda nan no ta dispone di documentonan consolida –si fragmenta- pa e team por determina con leu nos pais ta cu e meta di SDG (Sustainable Development Goals).

Ayera den cuadro di e presentacion di e Expohall banda di Checkpoint Color) riba crusada Colombustraat cu Nieuwstraat -cu lo keda habri pa publico entrante 1 di augustus- e mandatario a laga sa cu e sitio aki igualmente cu nan website lo bira un fuente pa nan obtene informacion entre otro riba nan vision y desaroyo di nan programa pa Aruba bira auto sostenibel riba energia alternativo practicamente aki 3 aña. Den preparacion prome cu e bishita cu nan a realisa na mei ultimo, e team di MAPS a puntra gobierno pa manda tur documento relevante riba maneho, strategianan, plannan pa asina e team por traha un mapa inicial.

Mas proyecto di energia solar
Den su entrevista cu e matutino aki, Sr. Alers a laga sa cu por bisa cu mas tanto 80% di e metanan di SDG ta menciona den e documentonan pero e ta indica cu mester tuma e conclusion aki cu cierto cautela. E analisis di e documentonan di gobierno no tabata uno cualitativo. Ayera sr. Eman a laga sa cu cuantitativamente Aruba ta un 40% caba di capacidad di produccion di energia green. Pero e ta sigur cu nos tin entre 40 pa 50% mas poni den nan plan pa inicia cu e proyectonan cu mester regula e variacion cu tin den e GRID (red di distribucion)

Un otro prioridad, segun e team di MAPS ta cu Aruba a inverti hopi den e transicion di uza recursonan di energia fossiel pa esunnan mas sostenibel. Pa sr. Alers esaki sigur ta algo pa aplaudi. Pero e ta haya ainda tin hopi cos den e ramo aki cu no ta cla; y tin basta potencial ainda pa logra e meta tendiendo na cuenta e agenda di SDG. Esaki haciendo uzo di otro fuente di energia renovabel cu lo por facilita principalmente e transicion di recursonan di energia. E ta duna como ehempel cu Aruba a inverti hopi den parke molina di biento, parke solar; pero tin un otro parke di molina (Urirama) planea, pero ta luchando den corte pa realisa esaki.

Prome Minister ta comparti basicamente e mesun posicion aki. El a bisa cu na e momento aki cu e proyecto di molina di biento ta sufriendo cierto tardansa debi na caso di corte, nan tin un plan hopi pro activo cu WEB y Utilities pa cumpli cu e vision cu hunto nan a pone pa 2020 pa Aruba keda e prome pais totalmente sostenibel.  E plan aki ta mas riba produccion di energia solar.

Sr. Eman a bisa cu antes e compania di utilidad tabata hopi cauteloso pa bay den energia solar pasobra e no ta constante. Pero e compania TESLA a bin desaroya un bateria cu ta cubri e demanda di coriente ora cu e solo no t’ey. Tanto asina cu e mandatario te hasta a mira cierto cambio den e vision inicial di 60% di energia di biento y 40% combina cu energia solar y otro. Pues nan ta mirando mas posibilidad riba energia di solar; y kisas nan lo keda den e 40 megawatt di biento so; y 60% di energia renovabel uzando solo y otro tecnologianan entre nan Thermo-energy y otro mas.

“Nos ta canando den un bon direccion pa cada bes haya mas alternativa pa locual ta trata proyectonan cu por ta tin cu cana un proceso pa ciudadano por participa. Pa loke ta e plan di bin cu un parke di molina di biento na Urirama ainda e ta para wardando e resultado di Corte locual ta trece cu ne 1 pa 2 aña di retraso. Sinembargo e ta mira cu cantidad di parkenan solar cu nan ta desaroyando actualmente a haya un empuhe hopi grandi.

Pero e echo cu nan ta cauteloso pa no construi un cantidad di parke di energia renovabel no tin tanto di haber riba e capacidad di por construi nan; pero e tin di haber riba estudionan con pa mantene e capacidad di distribucion constante; na momento cu nos ta depende hopi di energia renovabel, ya cu nan ta fluctua. E echo cu den algun ocasion nos comunidad a confronta problema cu coriente tabata pasobra e biento na Van der Piet “cay di repenti y bo ta haya un problema na WEB”.

El a bisa cu banda di e parke solar di aeropuerto di 4 megawatt; nan ta desaroyando uno di 5 megawatt na Seroe Colorado. Ademas siman pasa nan a sostene un reunion cu diferente partner caminda un solicitud a wordo haci na dump pa desaroya tres area cu nan a identifica como atractivo pa panelnan solar nobo. Un di nan lo ta uno di 10 megawatt cu ta den pleno desaroyo cu un partner nobo cu nan a adkiri, esta TESLA. E compania aki ta desaroyando panel solar hunto cu bateria cu ta haci cu tin menos fluctuacion di coriente, specialmente den oranan di anochi ora cu e solo no t’ey. Tambe na WEB lo tin otro parke solar di algun megawatt, igual cu den e proyecto smart community tambe.