Dowers reaccion (1).JPG
– Minister di Husticia Arthur Dowers ta splica Bon Dia Aruba cu tur e puntonan cu e comision Pro Siguridad a trece pa dilanti ta exactamente cosnan cu su maneho ya caba tabata haciendo. Por ehempel e nota di cambio pa aumenta e presupuesto di Husticia cu 10 miyon florin. 
Su colega di Financia ta trahando riba esaki ainda, minister Dowers ta bisa. ”No tin un deadline pa siguridad. E ta un proceso cu ta keda cana simpel. Si bo bisa, mi kier bay traha un edificio, mi tin un deadline pa traha e edificio. Pero un proceso di siguridad ta un proceso continuo anto locual bo ta haci ta basa riba e risiconan cu bo ta core y riba bo inteligencia.” 
E comision Pro Siguridad a dicidi pa acudi na parlamento pa ”urgi nos dirigentenan enfoca nan atencion riba nos siguridad.”  E comision no a tende nada di gobierno desde e manifestacion di 13 di october manera Bon Dia a publica den su edicion di ayera. 
Minister Dowers ta splica cu no ta asina cu bo por bisa cu por ehempel, entrante mañan mainta cierto cos ta caba pa e no pasa nunca mas. ”Cierto cos cu ta pasa den siguridad y den husticia,abo no ta dicidi esey. Pero si e pasa, bo ta actua riba dje. Mescos cu e problema di binimento di hendenan ilegal, nos a actua pisa contra esey. Despues bo ta mira cu ora nos a frena e banda ey, bo ta mira cu hende ta cuminsa bin legal anto drenta pa keda,” Minister Dowers ta comenta agregando cu aworaki nan ta trahando duro uzando diferente instrumento pa frena e parti aki tambe.
2000 ilegal menos 
Minister Dowers ta bisa Bon Dia Aruba 2000 ilegal a bandona e isla despues di e presion cu nan a pone riba e asunto aki. A reduci e posibilidad pa bo haya garantia pa hende di cual segun sr. Dowers, e pasonan aki ta treciendo nan resultadonan. ”Nos ta trahando den un forma hopi balansa, cu e medionan cu nos tin nos ta trahando duro pa logra e miho pa nos comunidad.” 
Cooperacion
Siguridad ta cuminsa prome cu e mucha segun pensamento di Minister Dowers kende ta enfatisa cu mester cuminsa inverti mas den nos hobennan. Minister ta splica cu: ”Locual nos ta mira di hopi hoben cu ta causa problema den comunidad, for di prome cu nan a nace nan ta rondona di problema, henter nan proceso di desaroyo etc. anto un dado momento bo tin hobennan diferente cu porta algun cu ta causa problema. Mi tin tur confiansa cu si nos cera cabes hunto, mas ainda esnan cu no ta cooperando aworaki cuminsa coopera, e futuro di nos muchanan lo ta bon anto e reduccion di crimen na termino largo lo wordo soluciona.” E risico cu nos ta coriendo door di influencianan di exterior por ehempel di Venezuela segun minister,  ta maneha esey tambe conhuntamente cu diferente departamento aworaki mas miho cu nunca den locual ta trata cooperacion.