Ayera durante e reunion publico den parlamento riba criminalidad, un palabra cu tabata sali frecuentemente for di e fraccion di oposicion di MEP den direccion di minister di Husticia, Arthur Dowers tabata: “narco-complaciente”.
Durante un pauze, minister Dowers a declara na Bon Dia Aruba cu e tipo di acusacion aki e no ta tuma na serio. “Ora cu sra. Wever-Croes ta bisa mi cu ami ta narco-complaciente, pasobra segun e, ami lo tin amigonan den droga.”
E mandatario a reacciona bisando cu e ta spera cu e lider di fraccion di MEP tuma retiro di su funcion como parlamentario, ora cu ta wordo divulga publicamente kende ta su amigonan cu ta den droga. Segun e mandatario Dowers, e no tin niun amigo den droga, ya cu e ta percura di protege su mes mas tanto posibel fo’i di hendenan cu ta hinca den cos robes.
“Claro bo por topa un hende cu por a haci algo robes; pero ami no ta lanta compania pa niun hende cu ta bin laba placa aki ariba di droga ,ni cu ta sostene droga, ni cu ta amigo di narco of caponan cu ta cera”, e ta declara.
E mandatario tabata masha indigna cu e tipo di acusacion aki cu a bini for di parlamentarionan Evelyn Wever-Croes y Xiomara Maduro. E no ta haya cu e tipo di acusacion aki ta di hende serio of sincero; ya cu si ta asina e lider di fraccion di MEP mester mira “cerca di bo prome, unda e narco-complaciente ta”.
E ta haya cu MEP ta un partido custumbra di ataca hende riba cosnan baho y vil. “Si bo tin e historia di e hendenan aki, bo sa bon ken ta esnan cu tabata defensor di narcotraficante di pasado y di awor.”
