– Contrario na loke ta wordo bisa e dunamento di permiso pa uza arma a baha considerablemente. Mientras cu e control a bira mas stricto pa evita cu arma lo por drenta nos pais ilegalmente for di paisnan bisiña, asina minister di Husticia Sr. Arthur Dowers a laga sa na Bon Dia Aruba.
Minister Dowers a bisa cu den su maneho no mas cu seis arma a wordo otorga cu permiso. Pero loke si nan a otorga mas tanto ta permiso pa e compania cu tin di haber cu transportacion di placa y cosnan di balor. Tambe pa e hendenan cu tin criadero di bestia tambe a haya permiso pa arma special. Pa e parti di e sector comercial masha tiki permiso di arma di candela a wordo otorga, segun e mandatario.
Maneho mas stricto
E mandatario a bisa cu e parti di maneho pa otorgamento di permiso di arma di candela ta mas stricto y limita compara cu periodo cu partido MEP di oposicion a goberna. Na Parlamento a start un discusion siman pasa rond di e topico aki durante e tratamento di presupuesto di Husticia cu a lanta basta stof.
Minister Dowers a señala cu bou e gobierno di partido gel tabatin “masha hopi hende ta haya arma bou nan gobierno”. Nan tabata permiso otorga na e famianan di e gobernantenan di turno, amigonan, yega y te hasta coordinador tabata cana cu arma, ya cu nan tabata sinti nan mes insigur bou nan mesun gobernacion, segun e mandatario.
El a bisa cu unabes cu e gabinete actual a cuminsa traha nan a kita tur e tipo di permisonan aki. Te hasta a wordo haci un apelacion pa esunnan cu tabatin arma di candela, y nan a entrega nan tambe.
“Esaki a trece como consecuencia cu e cantidad di armanan cu ta circula den nos comunidad contrario cu antes ta hopi menos. Y mi ta contento pa esey”, segun e mandatario.
Arma ilegal y amnistia
E ta reconoce a base di rapport traha y tambe nan mes por a ripara cu e ruta di bin cu arma for di Venezuela tin un presion hopi grandi pa negosha arma den mercado preto di nos pais. Mirando cu e situacion economico na Venezuela no ta uno di gaba ya cu e ta hopi malo, “tur loke nan ta bende nan ta purba di bende, esey ta nifica arma tambe”, el a bisa.
Pa contraresta e trafico ilegal di arma for di Venezuela –segun minister Dowers- nan ta trahando duro hunto cu autoridad uniforma di Warda Nos Costa, Duana y Polis pa preveni cu nan por trece arma pa aden. E ta admiti cu esaki ta un lucha largo, pero e ta bay. Tambe nos cuerpo di inteligencia ta trahando pa determina na ki momento nan kier trece arma ilegal den nos pais; y asina traha di un forma mucho mas preventivo y tambe represivo. “Captura nan na momento cu nan ta bini y kita e arma for di nan”, el a laga sa. Ta un trabou combina di diferente departamento te hasta esun di Finansa ta envolvi den e lucha aki, y minister Dowers tin e sentimento cu e lucha cu nan ta hibando ta hopi exitoso.
Aunke un amnistia no a wordo anuncia oficialmente pa esun cu tin arma cu ne, ya sea legal of ilegal, tog nan por entrega nan na nos autoridadnan competente, sin confronta castigo of problema cu husticia, esaki ta posibel keto bay. E mandatario a bisa cu esaki por na e momento aki.
Tambe nan a yega di hacie den pasado locual a produci resultado ya cu nan a haya algun arma cu a wordo entrega boluntariamente. Pero logicamente “niun criminal a bin entrega niun arma”, el a bisa. Pues den e sentido ey e mandatario ta haya cu un amnistia aworaki no ta traha. Tambe nan sa cu tin e negoshi di arma cerca e criminalnan, y actualmente nan ta evaluando a base di estudio kico pa haci, pero e no ta kere cu ta prudente pa bin cu un amnistia na e momento aki.
