Segun minister di Medio Ambiente, e compania cu ta ehecutando e exploracion di gas den nos Zona Economico Exclusivo, a haci un peticion solamente pa deshaci di awa di baño den nos lama, pero pa kimiconan specificamente nan no a pidi esaki.

Segun ley no por pidi dispension pa desperdicio, pues tampoco pa kimiconan. Esaki ta nifica cu Repsol segun su operacion di boramento specifica ta violando e ley local. Manera Bon Dia Aruba ya a skirbi.

Durante un conferencia di prensa ayera mainta unda Ministerio di Medio Ambiente a anuncia nan nota di maneho nobo pa naturalesa na Aruba, Bon Dia a puntra waarnemend directeur di Departamento di Naturalesa y Medio Ambiente (DNM), Naviel Lue, den ki dimension DNM a conseha tocante e proyecto di boramento den nos Zona Economico Exclusivo (EEZ).

Esaki mirando cu tin informacion ta circulando cu ta indica cu e companianan ehecutando e proyecto aki lo ta violando capitulo 5 di e Petroleumbesluit, segun experto riba e tereno Leo Henriquez. E companianan lo a traha un rapport por medio di avisonan, cual ta cita leynan local pero manera nos a publica anteriormente a laga e capitulo di descarga di desperdicio afo.

Conseho di DNM
Segun sr. Lue, e compania cu a entrega nan peticion na diferente instancianan di gobierno mester a cumpli cu cierto rekisitonan di acuerdo cu e Petroleumbesluit pa tanto DNM como Directie Scheepvaart y otro departamentonan. “E compania a entrega esakinan y nan mester a tene cuenta entre otro cu e acuerdonan di MARPOL (Organisacion Internacional Maritimo), cu tambe ta exigi pa ley e parti di deshaci di desperdicio den lama. Pues den esey nos a revisa e peticionnan y nos a conseha pa tene cuenta cu esaki y sigui e leynan y acuerdonan internacional.”

Mester splica cu MARPOL ta aplicabel solamente riba e parti di e maritiem y no boramento. Directie Scheepvaart sinembargo tambe a encarga cu supervision riba boramento. Den esaki nan mester controla a base di e Petroleumverordening/besluit. Pues den esaki ta mira cu tin un bruhacion awor pa con ta haci supervision riba deshaci di desperdicio den lama.

Minister di infrastructura y medio ambiente, Otmar Oduber (POR) añadiendo riba esaki, a bisa cu mirando cu prensa e trece esaki dilanti den e ultimo rueda di prensa e ministerio a pidi un nota riba esaki. “En berdad DNM tambe ta trece dilanti e punto cu ta trata e awa residual cu ta deshaci den lama durante e proceso di boramento. E awa residual aki cu nan ta deshaci di dje den lama durante proceso di boramento nan ta purifica y desinfecta cu un instalacion certifica cu ta cumpli cu exigencianan di MARPOL. Esaki ta un di e condicionnan cu DNM a pone.”

Pa loke ta trata control, un control mester tuma luga conforme e Petroleumbesluit segun minister, ‘y e ta tuma luga’. Di acuerdo cu e tratado aki cu MARPOL, minister a indica cu e control aki mester tuma luga di banda di Directie Scheepvaart.

”Pa ta cla, nos ta trata aki di e awa di toilet y esaki conforme ley ta posibel tanten e purificacion y e procesonan sanitario tuma luga. Biaha pasa tabatin un pregunta tocante kimiconan cu nan ta uza, pero di loke mi a compronde DNM no a haya ningun peticion specifico pa cualkier tipo di kimico cu nan lo tira den awanan.”