DIP, e departamento cu ta encarga cu planificacion di tereno, ta autorisa awor pa otorga tereno sin mester depende riba minister di Infrastructura.
Esaki minister Otmar Oduber (POR) di Infrastructura y Medio Ambiente a anuncia ayera.
El a bisa esaki durante un conferencia di prensa a trata diferente topiconan, cual tabata inclui World Wetlands Day riba dia di mañan, e caso di Oceania cu a wordo cancela y tambe cu lo percura pa proceduranan pa obtene tereno cana di manera legal.
“Na momento cu a scoge di tin un ROP, a percura cu tin varios area reconoci como saliña.” E mandatario a expresa cu desaroyo di proteccion di e areanan aki ‘durante e ultimo añanan a mira cu na diferente ocasion proteccion di wetlands (saliñanan) no a wordo respeta’. “Pa cual gruponan den nos comunidad a lanta varios biaha na defensa di esaki.”
Loke a contribui na e falta di respet aki ta cu gobierno anterior a haci algun cambionan na e ROP sin pasa esaki via e canalnan legal prescribi. El a splica cu a cambia e maneho sin fiha esaki den e Ordenansa Nacional di Desaroyo Teritorial, cual ta e base legal di e maneho delinea den e ROP. E ley aki ta un raamwet, cual ta un ley cu ta solamente prescribi e instrumentonan huridico basico pa por delinea con e desaroyo teritorial lo mester bay. Esaki mes ta e problema segun e mandatario: cu e ROP no tin suficiente base legal pa proteha cierto areanan di naturalesa manera saliñanan.
Sr. Oduber a expresa cu departamentonan DNM (medio ambiente), DIP y DOW ta trahando duro pa evita e maltratonan cu ta tuma lugar cu nos saliñanan y ‘draai bek’ decisionnan cu a wordo tuma cu ta contra e ley di ROP cu ta e maneho cu ta delinea exactamente con tin cu trata cu wetlands na Aruba.
Caso Oceania cancela
Den mesun rosea pa ilustra e trabounan cu ta tumando luga pa percura cu saliñanan wordo respeta, e mandatario a señala cu e caso cu a wordo lanta di Oceania contra Pais Aruba ayera a wordo cancela. Esaki despues di un proceso di negociacion cu a hiba cu Oceania/The Sands.
Motibo di esaki ta cu cierto momento e mandatario anterior Benny Sevinger (AVP) a bay di acuerdo pa cambia tur e reglanan di ROP den e area di Eagle Beach. A aumenta e densidad di construccion den e area y tambe a cambia e maximo haltura di construccion—segun sr. Oduber– pa acomoda e compania The Sands. Un erfpacht cu tabatin pa 120 condominium na cierto momento a cambia pa 840 camber, di cual mas cu 600 di esakinan all-inclusive y e resto time share, e mandatario a informa.
E mandatario a splica cu tur esaki a sosode den un temporada cu e gobierno anterior tabata demisionario, pues no por a mara Pais Aruba na cambionan asina drastico y contra maneho hancra den e ley di ROP durante e periodo aki.
Proceso pa otorga tereno
Sr. Oduber a sigui menciona cu tin trabounan tumando luga pa stabilisa e ‘desaster’ cu e gabinete anterior a laga na departamento di infrastructura y planificacion DIP. “E dianan di pasa peticionnan via e minister a caba. Nos lo percura pa DIP tin tur e autoridad sin mester depende riba e minister pa dicidi di otorga un tereno.” E mandatario a expresa alabes cu te ainda tin persona cu ta purba haya contacto cu su persona pa asina regla asuntonan di tereno. Pero el a bisa cu e maneho aki ta keda den pasado.
Riba e mesun punto nos a tuma nota di algun persona cu despues di a pidi tereno a warda pa basta largo (10+ aña) te cu a haya carta di Uitgifte Centrum di DIP. Pero e personanan no a bin na remarke en fin pasobra no tin firma liber ni nacionalidad Hulandes den man.
Mirando e maneho cu e gobierno kier hiba dilanti– delinea den plan di gobernacion– pa percura cu e proceso di haya tereno ta mas transparente, nos a puntra e mandatario e ora ey si e personanan aki tambe lo por haya un tereno otorga.
E mandatario a duna di conoce cu tin hopi peticionnan cu a wordo entrega– mas cu 7 mil– pero mas cu claro tin un limite na e terenonan cu por wordo otorga. Tin mas o menos 1200 persona cu lo por haya tereno, segun sr. Oduber. Esaki teniendo cuenta cu ‘hopi persona a haya carta firma pa e mandatario anterior’ cu por lo tanto lo tin cu conduci na haci un sondeo riba e prioridadnan cu lo tin cu pone pa cada ciudadano por haya tereno.
Pero e mandatario a splica cu ‘nos hendenan lo haya prioridad’, pues lo duna preferencia na esnan cu paspoort Hulandes y firma liber. Sinembargo e mandatario a tuma den consideracion– despues cu nos a trece dilanti cu cierto personanan a warda pa e procedura cana pero cu no tin firma liber ni nacionalidad Hulandes– cu lo por bay evalua esaki a base di por ehempel añanan inscribi na Censo. ‘Nos lo tuma esaki como sugerencia’, e mandatario a conclui.
