Diaranson atardi durante conferencia di prensa, Minister di Enseñansa di Aruba Endy Croes hunto Minister di Enseñansa di Hulanda, Robbert Dijkgraaf, a elabora ariba e conferencia anual di enseñansa, cultura y ciencia entre e 4 paisnan di reino. E ministernan a duna informacion tocante algun punto di importancia cu a discuti pa mehoracion general di e sistema di enseñansa.

Minister Croes a splica cu nan a dialoga profundamente ariba mas o menos 13 punto y cu e gruponan di trabou cu a wordo instala pa traha e diferente puntonan aki lo ta ocupa den e proximo lunanan cu e elaboracion di e temanan cu a wordo discuti pa asina duna e feedback necesario.

El a remarca cu tin algun punto cu a haci un impresion durante e reunion y un di e puntonan aki ta e doorlichting rapport cu ta cla caba. El a sigui splica cu nan a ricibi un presentacion corto di e doorlicthing rapporten di Aruba, Sint Maarten y Corsou, y e meta di e rapportnan aki ta pa ariba largo plaso por conecta e calidad basico di enseñansa cu e mercado laboral y busca un miho fluho den e sistema di educacion.

El a menciona cu tin 13 recomendacion cu a bin na mesa y nan lo elabora ariba e 13 recomendacionnan aki pa mehoracion general di e sistema di enseñansa.

Otro punto ariba e agenda cu Minister Croes a subraya tabata e exito di estudio (studiesuccess). Segun el a splica na september di 2022 na Universidad di Aruba, nan tabatin un conferencia tocante e studiesuccess y eynan tur seis isla a participa hunto cu Hulanda.

E tempo ey nan a firma un conclusion final, esey a wordo elabora y a wordo presenta durante e Vierlandenoverleg y aworaki nan a crea un comision cu lo realisa henter e plan di mobilidad y e oportunidadnan cu ta wordo brinda na e studiantenan.

Minister Dijkgraaf di su banda a expresa cu e encuentro tabata uno fructifero y cu nan a descubri cu algun di e desafionan principal den educacion ta miho pa nan aborda nan hunto. El a indica cu nan a haci afspraaknan concreto ariba esaki y un punto hopi importante cu el a enfatisa ta e punto di con e paisnan ta conecta cu otro: “Esaki ta tambe via e hobennan, e studiantenan cu ta sigui nan enseñansa na mas luganan,” el a bisa.

Un elemento importante cu Dijkgraaf a remarca con studiantenan di Aruba cu ta bay studia na Hulanda por ehempel, y e studiantenan cu ta encontra cu desafio- y bareranan, pero ta netamente e experiencianan ey ta locual lo tin un impacto grandi na Aruba na momento cu nan regresa nan pais back.

El a splica cu nan a yega na e acuerdo riba kico mas nan por haci pa mehora e exito di estudio (studiesuccess), y esaki, el a subraya, tin di haber cu un bon preparacion: “Aruba ya caba ta dialuna den esaki cu e Pre-Academic Year y na Hulanda e pregunta ta kico nos por haci pa laga e studiantenan sinti mas na cas y guianan miho y tambe kico nos por haci pa asina nan por regresa nan pais bek cu mas entusiasmo pa duna nan apoyo na comunidad y economia,” el a indica.

Un otro punto cu e Minister di Enseñanza Hulandes a splica cu nan tin den comun ta pa crea un miho vinculo entre educacion y e mercado laboral, y esaki no ta solamente e mercado laboral di awo, pero tambe e mercado laboral di futuro: “Esaki tambe nos lo traha hunto riba dje y e problema aki nos ta mir’e den tur cuater pais y mi ta kere cu den conhunto nos lo por soluciona esaki,” el a señala.

Durante e oportunidad pa haci pregunta na e mandatarionan, reportera di Bon Dia a puntra Minister Endy Croes si ya caba a tuma decision pa loke ta e idioma di enseñansa na Aruba. Minister Croes a contesta cu e recomendacion number dos den e doorlichting rapport ta bisa cu mester eligi un politica linguista consecutivo.

El a splica cu nan a instala un comision for di april di 2022 di profesionalnan cu a tene un debate nacional henter e aña. Na final di december el a ricibi un rapport prefinal y e rapport final mes lo bin riba mesa na final di februari y cu e informacion ey nan lo continua ariba e tema aki.

Minister Dijkgraaf a contesta e pregunta di parti di Bon Dia tambe cu tabata enfoca ariba e escasez di maestro na Aruba y kico ta e alternativa riba mesa pa soluciona e problema aki si Hulanda tambe ta enfrentando e mesun problema.

“E escasez di maestro tambe ta un problema cu ta uni nos y esaki ta un tema cual nos a dicidi di duna e siguiente stapnan hunto,” el a comenta.

El a sigui splica cu na Hulanda nan ta wak varios elemento. Un di esakinan ta concentra ariba con nan por stimula mas hoben pa bira docente, pero tambe con nan por haci e profesion mas atractivo y un punto hopi importante; con nan por mantene e docentenan cu tin den enseñansa.

Otro elemento cu el a señala ta cu na Hulanda tin biaha e problema di escasez di maestro ta varia di scol pa scol y pa esaki, el a remarca, nan kier stimula e scolnan pa traha hunto pa asina nan por yuda otro resolve e problemanan aki.

Otro punto importante cu Minister Dijkgraaf a menciona y cu ta pasa na Aruba tambe, ta e fortalecemento di e vinculo di training y educacion di e docente cu e scolnan pa asina studiantenan cu ta studiando pa docente por wak con e ta pa traha como docente.

El a agrega na esaki cu na momento cu nan caba cu nan estudio y cu nan ta trahando como docente, ta esencial como maestro pa nan tin espacio y oportunidad pa sigui siña, pa profundisa di nobo y pa haya conocemento nobo: “Asina por tin un vinculo cu e estudio di docente cu ta hopi importante pasobra asina un docente por keda desaroya henter su carera.”

Por ultimo el a splica cu nan ta wak tambe ariba diferente nivel escasez pa loke ta forsa laboral: “Ami personalmente ta haya cu e escasez den maestro ta manera e mama di tur e escasez den e forsa laboral en general, pasobra si nos no por haya e docentenan, si nos no por stimula, si nos no por pone e calidad di educacion pa docente halto, cu tambe ta un punto cu na tur cuater pais nos kier adresa, si nos no por mantene e status di enseñansa halto, si nos no por zorg cu continuamente e ta keda evoluciona, e ora mi ta kere nos tin echt un problema hopi grandi den nos sociedad,” el a finalisa.