Dialuna mainta pa 9am mester a trata presupuesto di Tourism Product Enhancement Fund (TPEF) pa presenta tur proyectonan di upgrading di e producto Aruba pa aña 2024. Pa un reunion publico por cuminsa mester tin 11 miembro di parlamento den sala presente.

Ayera mainta na parlamento tabatin 14 miembro den e edificio, dus reunion por a cuminsa sin problema. Esaki no tabata e caso, ya cu presidente di parlamento mester a cancela y pospone e reunion pasobra oposicion no kier a drenta sala, segun un comunicado di gobierno. E personanan cu no a drenta sala ta hendenan cu tin hopi aña caba den politica, hendenan cu tabata hasta parti di coalicion y oposicion. Ta trata di miembronan di AVP Dowers, Wyatt Ras, miembronan di MAS Marisol Lopez Tromp y Gunn y tambe miembro independiente Gerlien Croes.

Segun Oduber, “ta lamentabel y condenabel e actitud infantil y falta di madurez politico di parti oposicion pasobra nan sa e reglement van orde, pero toch nan a opta pa no drenta sala y asina perhudica e reunion bay door, perhudica e ley di TPEF wordo trata cu consecuencia cu e proyectonan ta keda ariba un status quo, paso nada no por cuminsa tanten cu e ley wordo aproba.”

Hopi di e miembronan di oposicion cu a keda para pafo ta e mas jongnan cu awendia ta papia di trece un politica nobo, un politica moderno, un politica diferente unda tur parlamentario mester traha hunto pa bienestar di Aruba, e comunicado ta continua. Politiconan nobo manera Gerlien Croes cu tur ora ta boga pa union y tambe pa cambia e manera di hiba politica distinto. “Awe pueblo por tabata testigo di e politica bieu y tradicional cu oposicion ta hiba! Ora di demostra cu accion cu nan ta hiba un politica diferente, e grupo aki a gewoon actua di mala fe manera mucha chikitonan pa ‘purba’ tranca e proceso. Tur proyecto cu tin ariba e programa pa cuminsa, ta pendiente y lo tuma mas tempo awo pa cuminsa.”

Minister Dangui Oduber kier a laga pueblo sa cu e proyectonan aki lo wordo ehecuta si. E reunion lo continua y ta pendiente awo di un fecha nobo. Segun Oduber, politiconan di oposicion a demostra cu nan kier cobra y nan no kier traha pasobra ora e momento yega pa debati den sala di parlamento nan ta opta pa no drenta!