6oct tram y metanan nobo (2).jpg

ORANJESTAD – Segun minister Otmar Oduber, e inversion cu a wordo haci den e tram a wordo saca practicamente, danki na e bon resultado di e mercado di turistanan crucero cu ta bishita nos isla.

E mandatario a bisa cu e tram ta wordo mira como algo “isola den caya grandi”, pero e tram a trece cu ne un promocion caminda nos isla a ricibi mas cu 6 mil turista adicional pa medio di barconan crucero.

“Ora bo wak cuanto esaki ta trece pa nos pais, e inversion den tram masha tempo a wordo paga”, segun minister Oduber.

Igualmente e mandatario a descarta cu lo wordo paga directamente pa uzo di e tram. Sinembargo eventualmente lo bin cu algun cambio riba su uzo pa cumpli cu cierto metanan.

Minister Oduber a declara durante un conferencia ayera cu: “Nos no kier pone e peso ariba comunidad di Aruba”. El a agrega cu esaki no tabata e intencion nunca ora cu nan a bin cu e proyecto di tram. E intencion tabata pa transporta nos hendenan local y turistanan den e area di nos centro di ciudad.

Cambio uzo di tram
Sinembargo e ta kere cu esun cu ta bin riba barco crucero nan punto di salida ta e tram y mester haci uzo miho di e coyuntura aki. Nan lo pone atencion y e mandatario aki lo percura hunto cu gerencia di Arutram pa uzo di e Arutram lo bira uno mas efectivo pa centro di ciudad. E kiermen pa percura cu informacion valioso lo wordo duna riba e tram aki pa cu esunnan cu ta uz’e pa nan por entre otro bishita comercio den centro di ciudad. Di e forma aki nan kier evita cu e tram lo bira djis un vehiculo pa keiro, ya cu esaki ta un di e criticanan cu ainda ta keda desde cu e proyecto aki a wordo introduci.
Pero di otro banda e mandatario ta kere cu mester tin mas iniciativa di e propio centro di ciudad pa bin cu actividadnan atractivo.

E ta kere cu comercio mester ta mas creativo pa haci uzo di e oportunidadnan cu tin pa crea un mercadeo nobo te hasta relaciona cu e sistema nobo di parkeer meter, y no keda hancra na e mesun mercadeo di 20 aña pasa mientras cu awendia tin un situacion totalmente nobo.

Pues e ta kere cu e instancia nobo BID mester traha hunto cu e comerciantenan cu sosten di Aruparking, Arutram y gobierno pa trece bek den caya tur e hendenan cu pa hopi aña pasa caba a stop di bay den caya pa bay na e shopping mall.