E aña aki ainda lo amplia Baby Beach, y sigui crea mas infrastructura, percura pa landscaping, restaurant y baño publico. Asina Minister di Turismo, Salud Publico y Deporte Dangui Oduber a informa Parlamento di Aruba, riba e plannan di Gobierno pa brinda mas perspectiva na San Nicolas.
E Minister a papia di un ampliacion fisico di e beach, sin bay den mucho detaye riba esey, pero a informa Parlamento cu mester a para e proyecto pa motibo di COVID-19. Sinembargo e proyecto lo sigui e aña aki y pa fin di Augustus, fase uno y fase dos di e proyecto grandi di Baby Beach lo ta cla, cu ta inclui mas parkeo.
Banda di Baby Beach, na Rodger’s Beach lo traha e pier nobo, tambe mehora parkeo y crea amenidadnan nobo, incluso restaurant y baño publico.
Tur ta proyectonan, segun Minister Oduber, cu ta necesario pa hisa calidad di e area wardando pa e hotel Secrets cu mester ta cla aki dos aña.
Dos boutique hotel
Pero e Minister a papia tambe di dos proyecto di boutique hotelnan, di no mas di 40 camber cada uno cu Gobierno ta contemplando pa e area. Segun Dangui Oduber, e dos hotelnan aki ta yuda diversifica e tipo di turismo cu Aruba ta atrae. (Red. Bon Dia Aruba a compronde cu un di e hotelnan aki lo ta construi cu bungalownan riba awa, banda di Jads Diving, pero no por a haya confirmacion di instancianan concerni).
Mester bisa cu e Minister no a amplia mucho riba e informacionnan aki durante su presentacion den Parlamento, cu mas bien tabata pa duna un bista general di su esfuersonan pa brinda mas perspectiva pa San Nicolas.
El a keda relativamente cortico, enfocando particularmente riba e proyecto di Baby Beach, pero tambe el a menciona e exito di e inversion cu a haci den IMSAN cu a produci mas di 110 cupo di trabou permanente, y a crea e potencial grandi pa turismo medico.
“San Nicolas lo tin un futuro briyante. E Gobierno aki mester bay pa cuater aña mas, pasobra COVID0-19 a stroba hopi.”
Finalmente Minister a duna un ilustracion di e inversionnan den veldnan deportivo na San Nicolas y Savaneta. “E Gobierno aki tin atencion pa San Nicolas. Nos no ta anuncia proyecto fantasma.”
