Den edicion di 12 di januari ultimo, Bon Dia Aruba a publica e keho di un ciudadano tocante uso di beachnan pa hende local, pa esaki, redactor a atende un conferencia di prensa di minister di Turismo y Salud Dangui Oduber pa haya informacion di e denuncia aki y con gobierno ta actua den e caso aki.
Minister Oduber a expresa cu e tarea di gobierno ta cu lo mester controla si esunnan cu ta huur e tentnan aki tin un precario vergunning “y manera ta conoci, tur e beach na Aruba ta publico y nos lo atende cu e keho aki pasobra no por ta asina cu esunnan cu ta huur e tentnan aki ta obstaculisa un local pa haci uso di nos beachnan cu ta publico, kiermen nan no ta permiti pa impedi un local sinta dilanti e tent pasobra e ta un area habri y publico cu tur hende mag di haci uso di dje, sea ta local of turista,” el a afirma.
Igualmente el a sigura cu nan ta bay controla si nan tin e precario vergunning y si di berdad nan ta prohibi localnan di sinta dilanti tentnan.
Riba rednan social for di algun tempo ciudadanonan local a bin expresan nan mal contento pa por haci uso di e beachnan na Aruba, na unda cierto comerciantenan ta scoge e beach pa lanta nan negoshi of hasta e construccion di hotelnan na unda ta yega di puntra den futuro lo ta posibel pa local por usa e mesun beach cu ta publico?
Ta comprendibel cu tin hende cu a wordo afecta pa Pandemia cu a keda sin trabou y nan a haya idea di crea nan mesun negoshi pa turista cu ta esunnan cu ta e pilar economico di Aruba, pero tambe ta importante pa puntra, ken ta e instancia encarga di duna permiso y controla e cosnan aki?
E tentnan aki ta ubica na area di Baby Beach y tambe na Arashi, manera usuario di red social Facebook a señala y a indica tambe cu e personal encarga cu esaki a bisa pa no pone su stoel dilanti esakinan pasobra “ta stroba e bista di e turista” como si fuera ta e turista so e unico cu tin derecho di usa e beach cu ta di uso publico.
Potret aki ta riba rednan social.
