ORANJESTAD – Ex minister y parlamentario di oposicion, Benny Sevinger a bin cu informacion pa prensa riba e cantidad di biahe y dia di vakantie cu e miembronan di gabinete Wever-Croes a realisa durante 2018.

Un total di 605 dia e ministernan di e gobierno actual tabata pafo di Aruba durante 2018. E ta haya cu esaki ta un promedio di dos periodo di vakantie den un aña. Pero mas cu 3 miyon florin a wordo gasta den e biahenan aki, segun sr. Sevinger.

El a bisa cu e informacion aki ta pasa na informacion raporta na parlamento, pero eventualmente e cantidad di biahe y dianan di vakantie por ta mas. Ademas, el a indica cu e cifranan di biahe y vakantie ta mas compara cu e gobierno anterior, caminda sr. Sevinger a forma parti di dje. El a bisa cu a pesar cu e gobierno aki a yega di bisa cu nan ta bay baha e gasto di gobierno destina na biahamento, esaki no a baha, sino cu el a subi. El a trece e supuesto lista di biahe di minister di Turismo, Dangui Oduber kende den un aña tabatin 30 dia cu vakantie. Tambe e tabatin 11 dia relaciona cu dianan di fiesta y tambe fin di siman, cu ta 104 dia. Kiermen di e 365 dianan di un aña, a keda 220 dia pa e minister aki por traha.

Sinembargo, e ta haya cu considerando cu sr. Oduber ta minister di turismo, cu ta e mandatario cu supuestamente mester biaha mas pa trece turismo, a biaha 28 dia so e aña aki. Di cual 192 dia e mandatario aki tabata na Aruba pa traha. Segun sr. Sevinger, esaki ta un argumento pakico turismo a cay, debi cu e minister encarga cu e cartera aki no ta haci su trabou afo.

Mientras cu minister di Transporte y sector primario, Chris Romero a biaha 19 biaha e aña aki, casi dos biaha pa luna. Di cual 130 dia sr. Romero tabata pafo di Aruba durante 2018. El a indica cu practicamente sr. Romero no ta biba na Aruba.

“Bo por bisa mi kico minister di agricultura ta haci 129 dia pafo di Aruba?,” sr. Sevinger a puntra su mes. El a bisa cu minister Glenbert Croes, kende tabatin 126 dia tabata pafo di Aruba durante 2018; y su colega Chris Romero, ta esunnan cu a biaha mas den e aña aki. Di un forma sarcastico, sr. Sevinger a bisa cu e ta kere cu sr. Romero mester ta e minister di Turismo; ya cu mientras cu e titular di turismo, Dangui Oduber a biaha 28 dia, minister Romero a biaha 129 dia.