Siman pasa, comunidad a presencia varios caso unda compania di UTV a causa consternacion riba rednan social, pa via di actonan ilegal cu a comete contra naturalesa y medio ambiente. Durante un conferencia di prensa cu Minister di Transporte, Chris Romero, a ofrece ayera, el a splica cu esaki no por ta posibel mas.
El a expresa cu su ministerio, hunto cu ministerio di Turismo, lo tuma accion contra e actonan aki. Nan ta averiguando con e sucesonan aki a tuma luga, ken e personanan ta, pa asina nan bay wak den cua direccion lo bay actua.
Di mesun manera, Romero a señala cu nan a haya sugerencia door di AHATA tocante con e companianan di UTV lo implementa ora un persona huur e auto en cuestion. Un sugerencia ta pa tin un guia dilanti y patras, pa asina obliga e grupo pa respeta e reglanan cu lo bin cune.
Ademas a trece dilanti e idea cu cada compania cu tin un tour cu UTV mester tin un GPS, pa programa e aparato cu e cual lo bisa e camindanan cu nan por core y cual no por. Si e auto aki ta sali for di e zona cu mag di core, e lo shutdown y manda un e-mail di biaha pa avisa e compania cu e UTV a bay den camindanan no permisibel.
“Medio ambiente ta hopi importante, y ora nos ta wak cu e suceso aki a tuma luga, Gobierno lo bay bin cu maneho adecua pa purba di evita cu e actonan aki pasa atrobe, y nos por proteha nos medio ambiente”, Romero a manifesta.
