Den un edicion anterior di Bon Dia Aruba, a resalta e falta di claridad pa locual ta trata e ceramento di dump. Manera Minister di Transporte, Integridad, Naturalesa y Asuntonan di Adulto Mayor, Ursell Arends, a informa dump lo cera dia 31 di december 2022, pero e noticia aki mas cu claro a trece algun pregunta.
Bon Dia Aruba a ricibi contesta di Minister Arends ariba e siguiente preguntanan: con lo haci cu e montaña di sushi cu tin aworaki na dump? Unda e personanan cu ta haci uso di dump regularmente lo mester benta nan sushi afo despues cu esaki cera? Con e proceso lo ta pa cera dump y con leu esaki ta?
Minister Arends a splica cu den su vision lo transforma e dump den un Parke Solar, pero e proceso di analisis y evaluacion ta andando. “E proceso di analisis cu ta andando ta pa fiha cual ta e miho forma y esun mas sigur pa tanto hende como naturalesa y medio ambiente. Esaki tambe lo bay via un openbare aanbesteding pa e forma. Mester analisa cada estudio debidamente pa asina por scoge un solucion duradero y pagabel”, el a bisa.
Hopi hende ta haci uso di dump pa tira nan sushi afo, pero na momento cu esaki cera e hendenan mester otro alternativa pa deshaci di nan desperdicio. Pa cu esaki Minister Arends a indica cu pa loke ta trata e sushi di cas normal, nada no lo cambia den termino corto, pues desperdicio di cas lo ser piki sea door di Serlimar of Ecotech manera ya ta sucede.
Pa loke ta e otro tiponan di desperdicio – comercial -, Minister Arends a splica cu esaki nan lo ser dirigi na diferente compania cu lo percura pa procesa esakinan. Cua compania y cua tipo di desperdicio lo wordo presenta proximamente den un “blue print” pa asina e ciudadano por sa precisamente kico ta su opcionnan.
El a agrega cu ciudadanonan mester tene na cuenta cu procesamento di desperdicio ta exigi cu desperdicio mester wordo entrega “limpi”, esta separa, y den cierto caso esaki por costa placa.
“Na Aruba nos no ta custuma cu procesamento di desperdicio y cu e costonan cu esaki ta trece. A paga sumanan relativamente hopi abao pa “dump” e sushi cu tur e consecuencia cu awe nos por wak na Parkietenbos tanto pa e habitantenan, e area, nos naturalesa y medio ambiente”, el a remarca.
Por ultimo, Minister Arends a bisa cu e publicacion di e “blue print” por ser cualifica como e señal oficial cu dump di Parkietenbos ta cera. “E blue print ta den su fase di finalisacion. Intencion ta pa e wordo finalisa dentro di poco y pa asina tur hende por tene cuenta cune despues di dia 31 di december 2022”.
