Den cuadro di un maneho nobo, Minister di Transporte, Comunicacion y Sector Primario ta informa tocante otorgamento di permiso pa ofrece actividadnan acuatico (transporte di pasahero contra pago y pa establece disponibilidad di boto), segun ex articulo 18 y 21 di e Ordenanza Nacional cu ta regarda awanan y playanan publico (Lb openbare wateren en stranden AB 1987 no. 124).
Segun un comunicado di gobierno, den anticipacion di un regulacion ministerial nobo a dicidi lo siguiente:
Companianan cu no tin intencion di realisa actividadnan di deporte acuatico den e area sur occidental di e costa na altura di e playanan ubica den e zona di e hotelnan ‘low y high rise’, pero cu tin como meta pa ofrece biahe den boto, actividadnan di ‘duik, snorkel y pesca deportivo’ entre otro, por bin na remarca pa un permiso si nan ta cumpli cu tur rekisito legal.
Kier a recorda tur compania acuatico cu den e cuadro di entrega di un permiso of renobacion, mester presenta un seguro di responsabilidad valido pa un (1) aña. E ordenanza ta prescribi den ex articulo 19 cu e compania mester responsabilisa su mes pa medio di un seguro, den caso cu comete daño na pasahero y/of tercer parti y/of na propiedad.
Pa e companianan cu tin intencion di ofrece actividad di deporte acuatico den e area ariba menciona (na altura di e playanan banda di e hotelnan ‘low y high rise’), ta keda vigente cu e solicitudnan pa cu esaki ta keda reteni te cu un proximo aviso.
Pa cualkier pregunta of informacion, por tuma contacto cu Directie Scheepvaart Aruba (DSA).
