Segun fuente Koninkrijksrelaties.nu, Ministerio Publico na Sint Maarten kier persigui minister Milklos Giterson di Desaroyo Teritorial y Infrastructura pa causa un accidente bou influencia.
September ultimo e mandatario a core auto despues di a bishita un bar, un biahe cu a culmina cu e mandatario ta accidenta tras di un bus mainta tempran. Varios pasahero mester a ricibi tratamento pa heridanan leve na hospital. E agentenan policial cu a topa cu e minister despues di e accidente tabatin duda si e mandatario tabata completamente liber di influencia alcoholico, pues a dicidi di lague tuma un test di sanger. E prueba di sanger berdad a establece cu sr. Giterson a bebe un par di glas di mas cu ta normal.
Ministerio Publico mester di permiso di Corte Comun (Gemeenschappelijk Hof van Justitie) pa por persigui mandatarionan of parlamentarionan, pues e siman aki lo a trata e peticion aki den un audiencia, pero a pospone esaki te januari pa via cu no tin un interprete disponibel segun fuente Daily Herald. Minister Giterson tin mester di un interprete mirando cu e no ta papia Hulandes.
