Ayera sindicato representando trahadonan di Respaldo a organisa un accion pa protesta e recorte di 12.6 porciento den salario. Tambe nan ta bisa cu e recorte ta afecta operacion di Respaldo.

E Minister encarga cu Salud, Dangui Oduber ta enfatisa cu ta Hulanda a instrui pa corta 60 miyon den cuido, cu ta un suma grandi y cu te dia di awe ta papiando cu Gobierno Hulandes riba e cantidad aki cu ta afecta calidad di cuido na Aruba. Oduber ta enfatisa cu e no sa di unda a saca e 60 miyon y cu ta diferencia di opinion cu Hulanda. “Nos a bisa cu nos ta habri pa reforma e gastonan di AZV, pa asina sigura cu e fondo ta keda sostenibel y cu nos por keda cu e mesun pakete. Pero 60 miyon ta dificil pa corta den y despues di un pandemia, unda netamente lo mester haci inversion.”

Pero pa loke ta Respaldo, e Minister a bisa cu e instancia, un fundacion, ta entre esnan cu mas a ricibi placa den e ultimo tres a cuater añanan. Na 2018, Respaldo tabatin un presupuesto di 10.4 miyon florin y e siguiente aña, e presupuesto a aumenta cu 2.4 miyon, un crecemento di 23 porciento. “Na 2020 a bolbe aumenta e presupuesto di Respaldo, cu casi 3 miyon florin. Na 2020 Respaldo a ricibi 15.2 miyon florin, cu ta un aumento di 18 porciento. Na 2021 a bolbe aumenta e presupuesto di Respaldo cu otro 2.2 miyon florin.” Pues den tres aña Respaldo a crece di 10.4 miyon pa 17.4 miyon, un aumento di mas di 60 porciento. Consecuentemente, e Minister ta sinti cu Respaldo, den cuadro di transparencia, mester duna cuenta na AZV, Gobierno, comunidad di Aruba y e trahadonan, kico a haci cu tur e fondonan. “Nan tabata e unico dunado di cuido cu a haya aumento di presupuesto di casi 60 porciento.” Consecuentemente, segun e Minister, Respaldo mester responsabilisa su mes pa e placa y cu e recorte ta djis un di e problemanan di e instituto. “Di parti di AZV y Gobierno a keda mustra compromiso cu salud mental.”

Comision Nacional di Salud

Pa loke ta e nerviosismo cu ta existi pa e contribucion propio, e Minister a bisa cu discusion y miedo cu tin ta un creacion di fraccion di AVP. Net e partido cu ora tabata na mando a tene consultanan cu gremionan y ta di aki a bin e plan di un lista positivo di remedi y e contribucion propio. “Awor AVP ta cuestiona e mesun proposicion cu nan, hunto cu gremionan, a bin cune.”

Ademas, e Comision Nacional di Cuido tambe a analisa e posibilidad pa cumpli cu e instruccion di reduci e gasto di cuido cu 60 miyon. Y e recomendacion di e Comision aki tabata netamente e introduccion di contribucion propio y lista positivo. “Pero awe, despues di a presenta e proposicion diripiente no ta de acuerdo cune mas?”

Pa Minister Dangui Oduber e ta dificil pa acepta con ta lanta un Comision Nacional di Cuido, pa bin cu sugerencia y awe, e mesun miembronan den e comision ta rechasa nan mesun proposicion. “Ainda nos no a introduci un contribucion propio. Pero si e bin mes, nos lo percura cu personanan cu malesa cronico y esnan mas vulnerable, nan lo keda exonera di e contribucion propio. Nos no kier pa nan keda sin haya nan medicamento.”

Dangui Oduber ta bisa di ta lamenta cu miembronan di e Comision Nacional di Cuido ta pusha tur responsabilidad riba pueblo y nan mes no ta duna un contribucion pa yuda baha gasto y traha mas eficiente.