(NLTimes) – Hende cu tin un desorden immuun hopi serio ta bay por ricibi un tercer dosis di vacuna di Covid-19. Haciendo esaki, e Gabinete Hulandes ta sigui conseho di Conseho di Salud Hulandes. Hende cu un desorden asina ta bay ricibi invitacion pa un ‘booster shot’ di nan dokter di cas pa comienso di october, e Gabinete a anuncia ayera.
Ta trata aki di entre 200mil pa 400mil pashent, segun minister demisionario di Salubridad Publico, Hugo de Jonge. Nan por ricibi e hangua na un sitio di vacunacion di GGD. E dosis extra por ocasiona un miho respuesta immuun den e grupo di persona aki, segun e Gabinete.
RIVM a dicidi ki pashent ta eligibel pa un dosis adicional di e vacuna contra coronavirus den consulta cu specialistanan medico.
De Jonge a bisa ademas cu no ta bay tin ‘booster shot’ pa otro hendenan, ni hasta pa esnan di edad avansa manera ta sucediendo na otro paisnan. Segun e minister, esaki no ta necesario pasobra e vacunanan ta hopi efectivo. Si esaki mester bira necesario, ‘GGD y RIVM ta cla pa un campaña di booster’.
E vacunanan usa comunmente na Hulanda ta 95 porciento efectivo den prevencion di sintomanan serio di Covid-19 cu ta conduci na hospitalisacion, y 97 porciento di casonan cu ta rekeri tratamento den Unidad di Cuido Intensivo.
