Ayera mainta durante un conferencia di prensa di minister di Salud Publico Dangui Oduber el a duna un update tocante e ultimo desaroyonan di Covid-19 na Aruba, na unda cu el a anuncia un test event pa november y e posibel introduccion di QR Code pa eventonan masal.

El a expresa cu e situacion e ultimo dos luna aki a conoce un mehoracion den e cantidad di casonan pa dia, tambe den e cantidad di personanan cu ta wordo hospitalisa y e positivity rate, el a menciona cu nan ta satisfecho con e ta bayendo ya cu luna di augustus tabata un luna hopi dificil caminda Aruba a wordo confronta cu e variante Delta y un cantidad di persona mester a wordo hospitalisa y otronan mester a bay Colombia dado cu akinan no tabatin e capacidad pa atende cu nan.

Minister Oduber a informa cu e situacion actual na hospital ta cu tin 13 persona interna, 4 den ICU, 9

riba piso general y 16 na Colombia, na e momentonan aki tin 12 cama den ICU disponibel cu cooperacion di gobierno di Hulanda cu lo t’ey te luna di november, e ora ey Aruba tin cu percura pa tin suficiente capacidad pa loke ta trata camanan di ICU pa e siguiente lunanan.

Di loke ta trata e cantidad di pashentnan cu a keda manda pa Colombia el a comenta cu di 39 pashent den total, 34 di nan no a vacuna, di 13 cu a fayece, 12 di nan no a vacuna, 10 di nan a bin back na Aruba y 16 ainda ta na Colombia.

E ultimo lunanan tambe nan a mira un mehoracion den e grado di vacunacion na Aruba, di e hendenan di edad entre 18 pa 59 aña, actualmente 77% tin un dosis y 71% tin e di dos dosis, esunnan riba 60 aña cu ta representa e grupo di risico 79% tin un dosis di e vacuna y 76% tin e dos dosis.

Esaki ta hopi importante pa e proteccion cu nos kier ofrece na nos comunidad” minister Oduber a enfatisa y a haci un yamada pa esunnan cu no a tuma e vacuna ainda pa nan bay na DVG for di dialuna te cu diabierna pa asina e persona por wordo vacuna.

For di hopi tempo caba, Crisis Team ta pensando riba diferente opcionnan pa Aruba por flexibilisa un poco mas y bay back na normalidad teniendo na cuenta cu Covid-19 t’ey ainda y lo keda pa un tempo mas, algo cu ta cuestion di e pais con e ta prepara su mes pa flexibilisa e medidanan y protocolnan in place pa asina ey di un manera sigur por bay back na normalidad cu tur hende a custuma di dje.

Test Event Smac ta organisa pa dia 13 di november. Varios medidanan a wordo flexibilisa caba y nan ta preparando pa organisa e prome Test Event cu ta bira un evento cu ta wordo organisa conhuntamente cu SMAC y Crisis Team na unda cu ultimo simannan tabatin varios reunion andando caba pa e evento aki por tuma luga, den evento 250 pareha por wordo participa, nan mester ta vacuna of tin cu presenta un test negativo pa Covid-19 cu cada persona tin pagel’e na un prijs di 75 dollar.

Tambe e comision ta considerando ki tipo di test lo wordo acepta pa e test event aki asina como tambe nan a afirma caba cu lo acepta test rapido Esaki lo tuma luga dia 13 di november den un ballroom na unda cu nan lo baila cu un live band y door cu ta e prome test event taskforce lo ta presente pa haci e controlnan necesario conforme e protocol y tur e palabracion cu a wordo haci entre Crisis Team y SMAC.

Despues di evento aki lo evalua con esey a bay na unda cu e intencion di esaki ta pa brinda di un manera sigur e oportunidad pa tur esunnan cu ta organisa eventonan y tur esey cu a wordo perhudica pa pandemia di Covid-19.

“Esaki ta e prome stap cu nos ta tuma proactivamente pa hunto como pais cuminsa bolbe back na normalidad, ta fiestanan cu ya caba pa un aña y seis luna no a wordo organisa y esaki ta bira nos prome test event”, Oduber a sigura.

Asina mes, el a trece dilanti cu nan ta trahando un plan hunto cu hospital y AZV pa di un manera structural amplia e capacidad, pa motibo cu ora ta bay back na normalidad mester tin suficiente capacidad na hospital y suficiente personal ya cu Hulanda a yuda cu esey pero Aruba no ta bay dispone di nan mas.

E situacion na Aruba ta permiti tambe segun loke minister Oduber a indica cu e recuperacion di turismo a pick up di un forma acelera back, na dado momento na luna di augustus a confronta e variante Delta pero e lunanan prome cu tabata juni cu juli tabata hopi bon pa turismo y economia.

Nan ta mira cu Aruba ta recuperando conforme e proyeccionnan cu nan a haci na cuminsamento di aña, nos ta bayendo miho di loke nos mes a proyecta” danki na diferente instancianan cu a percura pa Aruba por recupera e turismo manera cu e tabata den pasado, segun el a afirma.

Na luna di september nan a proyecta mas bishitantenan pero debi cu a haya varios cancelacion di diferente gruponan Aruba a recupera un 82% di su turismo, lo cual minister Oduber a declara cu esey ta bon pa ta den aña di pandemia, Aruba den comparacion cu otro competidonan ta un di e paisnan den Caribe cu ta recuperando hopi mas miho.

Nos mercado principal cu ta Mericano si ta registrando cifranan hopi positivo, den luna di september a recupera den un 91% di turismo compara cu september di 2019”, el a indica.

Pa loke ta trata turismo crucero, minister Oduber a trece dilanti cu esey tambe ta recuperando y apenas den luna di juni 2021 Aruba a ricibi su prome barco crucero despues di pandemia Covid-19 na unda cu nan ta mira un recuperacion lento pero sigur ta aumentando gradualmente, desde juni te cu september Aruba a ricibi 29.480 pasahero, na october 13.200 pasahero y nan ta constata cu pa lunanan di november y december por tin mas di 35.000 pasahero.

Posibel introduccion di QR Code Sharline Koolman di DVG cu tambe tabata presente den conferencia di prensa aki a expresa cu nan ta considerando e uso di QR Code den futuro, e conseho aworaki di Crisis Team ta pa personanan por usa e codigo aki pa por drenta na eventonan masal.

Pa e motibo ey nan ta habri pa sinta cu SMAC manera nan a menciona caba pa loke ta trata eventonan grandi como carnaval pa wak con nan lo coordina esey mas miho na unda lo por bin mas protocol pa eventonan y tambe pa deporte.