(DutchNews.nl) – Minister di Salud Hulandes, Ernst Kuipers a bisa cu e no por garantisa cu no ta bay impone un lockdown nobo na Hulanda pa motibo di e riesgo cu un variante nobo di coronavirus, mas infeccioso y problematico, por aparece.

Kuipers a haci e comentario durante un debate riba e plannan di gobierno pa deal cu coronavirus a largo plaso. Gobierno a bisa anteriormente siman pasa cu ‘trapi di reglanan’, specifico pa cada sector, por hunga un rol clave den reduci e transmision di e malesa sin cu gobierno mester impone restriccionnan manera cera scol, bar y restaurant.

Kuipers a reconoce den un sesion informativo den Parlamento siman pasa cu un tin un riesgo ‘hopi real’ cu miyones di persona ta bira infecta durante herfst, pero gobierno tin meta pa tene e ceramento na un minimo.

Na lugar di esey, organisacionnan den sectornan manera educacion, retail y industria di biahe mester acorda na ki momento ta introduci medidanan manera distancia social, sistema di un solo via, y pantaya pa reduci infeccion.

E minister tambe a bisa parlamento diahuebs cu e no ta preocupa tocante e capacidad di huntanan di salud regional pa ehecuta un ronda nobo di vacunacion, bisando cu por vacuna tres miyon persona dentro di seis siman.

Sinembargo, e cantidad di persona cu tin booster y dosis di refuerso di e vacuna ta causa preocupacion, Kuipers a bisa. Apenas 64 porciento di adulto a ricibi un booster, y menos ainda di esnan cu ta eligible pa un di cuatro dosis a tuma un.

Riba diahuebs, Kuipers tambe a rechasa e yamado di parlamentarionan pa un refuerso den capacidad di Unidadnan di Cuido Intensivo (ICU), bisando cu e cantidad actual di cama ta suficiente. Hulanda tin 993 cama di ICU, di cual 686 ta actualmente ocupa, incluyendo 24 pashent di coronavirus, el a bisa parlamentarionan. Si ta necesario, por aumenta e cantidad di cama na 1,700, pero no mas pa motibo di e escasez di personal cu training, y e impacto riba otro servicionan di hospital, e minister a bisa.

Tin preocupacion cada bes mas grandi cu un ola nobo di coronavirus ta na caminda. E cantidad di test positivo pa coronavirus registra cu instituto di salubridad publico RIVM a aumenta 64 porciento durante e siete dia te cu diamars mainta di siman pasa, na 15,526. E aumento den test positivo oficial probablemente ta conecta na e dos variante nobo di Omicron, cu ta ‘ganando tereno’ na Hulanda, RIVM a bisa.

RIVM ta monitoriando e transmision di e virus mediante restonan den awa di riool, y e total ey tambe ta aumentando di manera stabiel. Desde maart, hende cu tabatin un self-test positivo ya no ta rekeri pa confirma esaki mediante nan hunta di salud regional. Asina mes, e cantidad di hende cu ta solicita e test PCR gratis ta aumentando. Huntanan di salud regional a ehecuta mas di 18mil test den e siman te cu diamars ultimo, e cifra mas halto den dos luna.