Minister di Salud y Deporte, Dangui Oduber a anuncia un rato pasa 5 caso positivo di COVID-19 nobo na nos isla, den total e casonan a yega na 17 na e momentonan aki. Tambe a informa tocante decisionnan cu a wordo tuma den dia.
Oduber a menciona cu tin 250 caso cu a test negativo, 130 persona den cuarentena cu nan tabatin contacto cu e personanan afecta y 756 persona den cuarentena cu a bin di afo cu a ricibi e instruccion pa bay den cuarentena. Asina mes el a señala cu e edad maximo di personanan cu a test positivo ta di 64 aña y edad minimo ta di 23, averahe ta 41 aña.
Oduber tambe a bisa cu tur pashent cu a wordo contagia ta den bon condicion, tur tin sintoma, pero ta den bon estado di salud.
Ademas di esey, el a insisti pa comunidad sigui instruccion di Gobierno, sigui e cuarentena pa cuida famia y esunnan mas vulnerabel.
“E virus aki no ta plama su mes, hende ta plama e virus y ta contagia otro” Oduber a sigura.
Di e 5 caso nobo, 1 ta posibel cu a bin for di NY, tres di nan ta local y di ultimo personanan tabata wardando informacion di dje.
Pa finalisa, el a menciona cu gobierno por tuma un decision mas drastico, cu ta e aplicacion di un shut down completo pa pais Aruba, ya cu e ciudadanonan no ta tumando e situacion na serio.
