Recientemente minister di Salud Publico, Dangui Oduber a referi riba registracion oficial di cancer. E ta lamenta cu hopi hende ta fayece pa causa di e malesa aki, y den cuadro di prevencion, e ta kere cu ta importante pa Aruba tin un registro oficial di cancer.

Den esaki, desde aña pasa nan a firma un acuerdo di cooperacion cu CARFA, caminda nan a sinta den varios ocasion cu hunta directiva di hospital. Segun e mandatario, e hunta anterior no tabata brinda e cooperacion necesario pa nan por haya tur informacion relevante pa cuminsa cu e proceso di registro aki. Cu e cambio di e hunta directiva y Conseho di Supervision den hospital, nan a haya e cooperacion necesario hunto cu DVG, pa finalmente cuminsa traha pa Aruba tin un registro nacional di cancer, cu ta uno importante den cuadro di prevencion. E ta spera cu pa e prome kwartaal 2021, Aruba lo tin su registro nacional di Cancer.

Caso Valdes

Tambe e mandatario a tuma nota di e declaracionnan cu Sr. Albertico Valdes a yega di trece den prensa riba su caso y tambe riba e trato cu e kier como pashent for di AZV y tambe for di hospital. Igualmente el a bisa na e matutino aki cu gobierno mes a yega di ricibi carta di Sr. Valdes como ministerio di Salud Publico y nan a yega di atende cu esaki.

Den e caso aki e mandatario a expresa cu ta trata di preocupacion cu tin di pashent asegurado di AZV y tur e tipo di preocupacion aki cu ta ta wordo manda pa su ministerio, nan ta purba intermedia y tuma contacto cu AZV.

Tambe e mandatario a tuma nota cu AZV a bay den extenso riba caso di Sr. Valdes cu ta uno ‘basta complica.’ E ta haya cu AZV ta esun indica pa atende cu e tipo di caso asina. Aunke impresion cu tin afo ta cu e minister ta dicidi of no, ki ora un pashent mester wordo manda. Mientras cu no ta asina ya cu ta specialista mes ta esun cu mester manda un solicitud pa e comision di specialista encarga pa evalua e situacion di e pashent.

Segun minister Oduber, finalmente e comision aki cu ta consisti di expertonan ta determina si un pashent mester wordo trata afo of no. Den e caso aki como minister di Salud Publico e no tin niun ‘input.’ El a agrega cu no ta e minister esun cu ta dicidi ken ta bay of ken ta keda.

P’esey den e caso di Sr. Valdes ta AZV esun cu ta atendiendo cu su caso. Loke e mandatario por compronde for di AZV mes ta cu nan lo duna claridad na Sr. Valdes denter di poco. Igualmente el a bisa cu tur pashent cu tin cualkier keho sea trato, cuido of servicio, por entrega un keho oficialmente sea na Inspectie Volksgezondheid Aruba (IVA) of Conseho di Colegio Medico.