Durante un conferencia di prensa ayera mainta Minister di Transport, Integridad, Naturalesa y Asuntonan di Adulto Mayor, Ursell Arends, a brinda algun detaye y a informa ariba e ultimo desaroyonan di e actividad Baki den Bario, di e campaña nacional Limpi Limpi, cu lo continua den 2024.
Primeramente Minister Arends a informa kico tur a logra caba cu Baki den Bario den 2023. Aña pasa na comienso di aña, Gobierno di Aruba a lansa e campaña nacional Limpi Limpi pa conscientisa comunidad ariba maneho di nan desperdicio. Relacion na esaki, den luna di september a cuminsa cu Baki den Bario. Un actividad di separacion di desperdicio cu a pasa di districto pa districto y cu a tuma luga te cu december ariba casi tur diasabra.
El a remarca cu e enfoke principal di Baki den Bario tabata separacion di desperdicio y e yamada tabata na tur e habitantenan pa separa nan desperdicio di antemano pa asina na momento cu nan yega na e parke di separacion, e desperdicio ta separa caba pa por deposita esaki separa den cada baki pa e por wordo procesa den un forma responsable caminda cu por crea materia prima cu por wordo usa localmente of materia prima cu por wordo exporta.
E actividadnan di Baki den Bario a tuma luga bao guia di Bureau City Inspector y tabata un colaboracion cu diferente compania y stakeholder pa asina por procesa e desperdicio, locual e mandatario a resalta, a duna un resultado positivo.
El a informa cu durante Baki den Bario tabata colecta ocho tipo di desperdicio separa cual tabata green waste, metal, e-waste, construction waste, desperdicio mescla, taira, carton y tambe azeta di cushina. Esaki, el a señala, tabata pa stimula e parti di separacion, pero tambe pa recupera, reusa y recicla desperdicio di un forma responsable.
Pa aborda e parti di reusa, Gobierno di Aruba a invita Fundacion Pa Nos Comunidad pa t’ey presente na tur e actividadnan di Baki den Bario pa stimula comunidad cu den caso cu kizas tin articulonan di cas den bon condicion, comestibel y tambe diferente otro producto cu por wordo usa, por ehemplo, pa un famia den necesidad, esaki por a wordo entrega na Fundacion Pa Nos Comunidad durante e actividad y di e forma aki prolonga e ciclo di bida di e productonan aki y minimalisa e cantidad cu ta termina como desperdicio.
“Durante e 11 actividadnan di baki den bario den aña 2023, a conta cu mas 4998 vehiculo cu a bay deposita nan desperdicio y a logra colecta mas di 781 baki di desperdicio,” Minister Arends a subraya.
Pa loke ta e meta di e campaña nacional Limpi Limpi, e mandatario a enfatisa cu e parti di conscientisacion di e habitante pa procesamento responsable di desperdicio a haya un gran acogida y “comunidad a mustra claramente cu nan ta cla pa separa desperdicio pa e por wordo procesa den un forma responsable.”
“Maneho di desperdicio ta keda un responsabilidad comparti. Gobierno ta facilita e actividad di Baki den Bario, conhuntamente cu tur e partnernan y e yamada na comunidad ta pa haci uso di esaki y deposita bo desperdicio,” el a agrega.
Manera ta conoci caba e actividadnan di Baki den Bario ta bay continua den 2024 y ta bay tuma luga un biaha pa luna den diferente bario y districto rond di e isla. Minister Arends a splica cu esaki ta basa riba e datonan colecta, y tambe datonan di pasado, cu ta indica unda tin mas hopi habitante, unda ta mira cu mas hopi desperdicio ta termina den naturalesa y asina a scoge e puntonan clave pa organisa e actividad.
El a informa cu durante 2024 ta bay tin un total di 13 actividad di Baki den Bario y e prome lo tuma luga dia 27 di januari na Compleho Deportivo Pos Chikito.
Pa loke ta e orario di e actividad, Minister Arends a indica cu esaki ta keda mescos, a pesar cu hopi persona den comunidad a expresa e deseo pa esaki cambia y bira mas ora.
El a splica durante e ronda di pregunta for di miembronan di prensa cu a evalua esaki, pero mirando cu e actividad no ta depende solamente di Gobierno di Aruba, pero tambe di tur e partnernan y teniendo na cuenta tambe cu e aspecto humano, ya cu hopi di esnan cu ta traha na e actividad ta for di marduga riba pia y despues ta para oranan largo den solo, a yega na e consenso cu ta mantene e mesun orario.
Algo cu ta prohibi pa tira den e bakinan durante Baki den Bario ta asbest, pero asina mes tabatin algun ciudadano cu a tira asbest toch. Minister Arends a indica na miembro di prensa cu na varios ocasion nan a logra intercepta algun ciudadano berdad cu kier a tira asbest durante e actividadnan di Baki den Bario.
Relaciona cu esaki el menciona cu nan ta preparando un campaña di conscientisacion mirando cu tin dos compania so certifica pa atende cu asbest.
“Gobierno a sinta cu ambos compania pa scucha for di nan y hopi biaha loke ta pasa ta cu ora cu e companianan aki wordo acerca pa atende cu asbest sea na un cas of negoshi, na momento di entrega quotation e ciudadanonan ta opta pa bay otro caminda, pa busca otro hende cu ta hacie mas barata,” el a bisa.
Algo cu ta peligroso pasobra asbest ta hopi dañino pa salud y naturalesa. El a agrega cu aworaki nan ta bay intensifica e campaña pa loke ta trata con pa atende cu asbest mirando cu tin varios luga, tin varios cas cu ainda tin asbest y e ta un preocupacion grandi cu gobierno tin. “Mi no kier bin cu panico den nos comunidad, pero si nos ta bay prepara pa tende cu esaki,” el a remarca.
