Minister di Naturalesa: “Situacion di cacho y pushi riba caya ta alarmante y mester busca origen di e problema”

Ayera minister di Transporte, Naturalesa y Asuntonan di Adulto Mayor Ursell Arends mediante un conferencia di prensa a trece dilanti e topico di bienestar animal unda a anuncia diferente proyecto cu tin como obhetivo di conscientisa doñonan di mascota pa bira mas responsabel.

For di 2012 Aruba tin un ley di cacho y bao di Gabinete Wever-Croes 1 a introduci e plan nacional pa atende cu e cachonan riba caya, den e gabinete actual Ministerio di Naturalesa a asumi e responsabilidad pa loke ta trata e bienestar di animal caminda nan a logra adapta e plan ey y a crea e asina denomina National Plan for Stray Animals (NPSA).

Minister Arends a splica cu durante e dos ultimo aña nan a logra introduci pasonan pa asina compromete nan mes den e maneho di NPSA, den esaki nan a duna lesnan y material pa scolnan, nan a crea un plataforma caminda por registra e mascotanan a traves di varios veterinario cu ta traha na Aruba y alabes nan a haci un campaña di conscientisacion unda nan kier crea doñonan di mascotanan mas responsabel.

For di ayera a cuminsa e ehecucion di un departamento di control animal unda cu awe mes DOW ta bay anuncia e destaho publico pa un proyecto caminda esaki lo bay ta situa na Kibaima mirando cu Aruba ta pasando den un situacion caminda cu tin un over poblacion tanto di cacho y pushi, ademas el a sigura cu Centro di Control di Cacho (CCC) ta completamente yen y e fundacionnan cu ta atendiendo cu e problematica aki tambe a yega na e maximo di nan capacidad y mester bin solucionnan urgente manera e mandatario a sigura.

Den e proyecto aki di departamento di control animal ta bay tin un total di 80 cacho y 40 pushi y facilidad actual di Centro di Control di Cacho por acapara solamente 8 cacho y 4 pushi “esaki ta laga nos cu un buraco hopi grandi mirando e situacion cu tin den comunidad ora ta trata di cacho y pushi, asina como otro tipo di bestianan.

Departamento di control animal tambe ta bay tin tarea pa ubica otro tipo di bestianan conforme cu e tratado di CITES cu ta trata di Comercio Internacional di Especienan Menasa di Fauna y Flora Silvestre (CITES).

E destaho publico ta cuminsa awe 21 di november te cu 20 di december unda tin e oportunidad pa haci e proposicion “p’esey mi ta haci un yamada na esnan interesa den e desaroya e construccion aki pa Gobierno di Aruba pa haci uso di esaki mirando cu prome cu fin di aña 2024 lo mester keda cla pa asina cuminsa atende cu e problematica di un forma mas holistico y structural,” el a sigura.

Pa loke ta trata maneho di NPSA, durante dos aña ta colectando datonan unda nan a compromete nan mes como Gobierno pa ehecuta e plan cu tur stakeholders, aworaki nan a yega na e fase pa evalua unda cu esey a duna resultado, pero manera el a menciona caba, na e momentonan aki e Centro di Control di Cacho y fundacionnan ta yen y p’esey ta momento pa bin cu un otro maneho pa soluciona e problema.

“E plan cu nos tabatin tabata atende e sintomanan y e maneho nobo ta bay atende cu e problema for di su origen” minister Arends a señala.

Den luna di januari proximo ta bay presenta e plan aki na tur stakeholders pa dialoga y haya nan opinion y despues nan ta bay cuminsa implementa e maneho nobo, mirando cu no ta un problema di cacho of di e pushi, sino cu ta un problema di e ciudadano “di a nos como ser humano cu constantemente ta bandona cachonan y pushinan den areanan publico creando e problema akinan, p’esey mes pa hopi biaha ora nos ta papia di e tema aki, e ta bay pa nos balor y normanan como ciudadano, e cambionan cu nos kier mira ta keda na nos mes pa implementa esaki y duna un transicion pa e mascotanan por haya un miho bida.”

E problematica segun e mandatario a expresa, ta debi na e gran “falta di amor pa e mascotanan y pa e motibo ey tambe mi ta kere cu mester tin mas empatia, respet y sentido di responsabilidad ora ta admiti un mascota den hogar.” Arends a afirma.

Final di aña, minister a bisa cu ta e epoca mas bunita di aña pero e mascotanan ta sufri mas, pa e motibo ey nan ta bay lansa e campaña di microchip pa e periodo ey debi cu tin biaha e mascotanan ta perde den dianan aki door di klapchi.

Pa finalisa, el a laga como mensahe pa ciudadanonan bira doño mas responsabel di mascotanan y pa ora di adopta un di nan ta mas consciente di kico esey ta implica.

Pa loke ta trata control, minister Arends a señala cu riba caya Cuerpo di Polis a bin repartiendo multa y tambe cachonan a ser kita for di e cas “ pero e problematica ta asina grandi cu nos no por tin KPA so pa atende cu e problema, Bureau City Inspector ta adaptando nan instelling besluit y formatie plan, ademas di e Landspakket pa mira con e departamento mester funciona, pero esaki ta un situacion alarmante di cacho y pushi riba caya y mester busca e origen di e problema.”

Den e proyecto di departamento di control animal tambe nan ta bay enfoca pa e mascotanan cu lo yega na e luga aki por ser adopta, “pa hopi biaha un gran parti di cacho y pushinan ta ser adopta pa turistanan di Merca, pero mi ta kere tin suficiente famia na Aruba cu tambe por adopta e mascotanan aki y duna nan un bon bida,” e minister a finalisa.