Minister Paul Croes di Labor ta calcula cu e impacto di e apertura di e refineria lo general rond di 4 mil cupo di trabou, unda “berdaderamente lo mester importa algun persona for di exterior”, el a bisa.
El a indica cu pa garantisa cupo di trabou na nos hendenan local, Citgo desk a haci un analisis di loke nos tin na Aruba como trahado. E oficina aki lo bira un tipo di banco di trahado pa e refineria na momento cu un compania mester di trahado. E desproporcion di trahadonan local cu esun di afo cu a yega di aplica pa un trabou den e refineria ta grandi. Alrededor di 700 Arubiano a aplica, mientras di otro banda alrededor di 10 mil Venezolano tambe a aplica.
Trahado local ta prome
Pero lo bin cu un proceso riguroso caminda nos trahado local tin prioridad. “Si un compania ta pidi bo cu mester tanto trahado di afo, nos ta bisa warda un rato, nos tin tanto hende local…”, segun minister Croes.
El a declara cu e reaccion di trahadonan Arubiano cu a bay exterior ora cu Valero a cera e refineria, nan animo ta grandi di por bin traha na nan pais natal bek.
Minister Paul Croes a agrega cu e importacion di trahado di afo lo ta pa un periodo defini specialmente pa proyectonan. E ta reitera cu e ta “minister di Labor di Aruba, mi no ta minister di Labor di un otro pais. Nos Arubiano lo tin preferencia den e caso aki den e refineria y den e contratistanan…”.
El a bisa cu tanto persona local cu no tin trabou y esun cu a bay afo lo por aplica pa nan wordo scrutina pa traha den e refineria.
Cifra desempleo
E ta premira caba cu e cifra di desempleo lo wordo reduci cu 3% entre 2016 y 2017, danki na e reapertura di e refineria.
E mandatario a haci un suma di e cifra di desempleo desde 2009 cu –segun minister Paul Croes- tabata alrededor di 12%, y e ta calcula cu pa 2017 nos lo tin un tasa di desempleo entre 4.5% pa 5%. Pues e ta considera cu e reduccion di desempleo aki di mas cu 50% den un periodo di 8 aña ta algo significativo.
Mirando cu e concepto di ley di presupuesto 2017 a wordo entrega na Parlamento, minister Paul Croes a indica cu e reapertura di e refineria den man di Citgo lo genera un suma adicional entre 100 pa 150 miyon florin den nos presupuesto.
