Minister di Labor, Energia y Integracion, Glenbert Croes tocante FASE: “Si AVP tabata den gobierno, kico a nan lo a haci si nan tabata para den nos sapato?”

E declaracion aki a bin dilanti den un conferencia di minister Croes, unda a ser puntra kico ta e pensamento di minister Croes tocante e declaracionnan di parlamentario di partido AVP, Arthur Dowers unda a expresa cu den e programa FASE tabatin corupcion.

Minister Croes a enfatisa cu awor pueblo sa kico a nan como gobierno a haci pa yuda mas di 12.000 ciudadano y henter un pais pa sobrevivi den momentonan dificil. El a sigura cu a bin cu Fondo di Asistencia Social di Emergencia (FASE), a bin cu subsidio di salario, a bin cu yudansa pa comerciantenan chikito y mediano, a bin cu paketenan di cuminda di Cruz Cora y Fundacion Pa Nos Comunidad, tambe a pidi pa WEB, Elmar y Setar pa coopera, igualmente pa banconan por coopera. “Un esfuerso cu comunidad a haci y riba e puntonan unda cu por tabatin un problema, p’esey mi ta reconoce e trabao sobrehumano cu e team di FASE a haci”, el a sigura.

Tambe el a splica cu tabatin bruhamento na momento cu hende tabata yena e number di cedula cu nan number fiscal di departamento di Belasting, y tambe tabatin erornan cu hende cu no tabatin cuenta di banco y tabata purba yena e cuenta di banco di un persona conoci. “Nos tabatin casonan, cu tin un hende cu tabata yama FASE helpdesk pa reclama cu e no a haya su FASE, mientras cu FASE a pasa; y na comienso tabatin eror administrativo unda FASE a pasa y por ta hasta nan tabatin nombernan similar, e FASE a pasa y tabata den un cuenta di otro y e otro hende no kier a dun’e e placa.”

Full e transaccionnan a tranca door di controlnan y pa e motibo aki minister Croes a bisa cu ta un reflexion pa nos Contraloria General cu nan a pone den nan rapport e situacion cu tabatin posibilidadnan pa fraude. “Ken a comete e fraude? Nos cu tabata encarga cu e programa of e persona cu a purba di haya FASE cu no tabata bin pa remarca?”

Tin casonan cu a wordo atendi pa FASE taskforce y tin casonan cu a wordo atendi pa CAD cu segun minister Croes pa purba di relativa e discusion, 1.463 persona a haya FASE y subsidio di salario cu a wordo atendi y coregi, “pero esey kiermen cu bo ta bay laga e 12.246 hende na caya of bo ta bay atende cu e problema? pasobra tur cos cu a bay malo nos ta atendiendo nan, pero nan ta sali fo’i e punto di bista cu nos no ta atendiendo cu nan of nan ta kere cu nos ta haciendo politica”, el a bisa.

Como minister encarga cu FASE den ambito politico el a enfatisa cu den eleccionnan anterior el a bay atras cu voto “kiermen bo no por acusa mi cu a mi a haci faboritismo politico”.

Den su pensamento e minister Croes ta haya cu ta facil dos aña despues di e pandemia cu a paralisa e mundo, pa bin acusa nan cu ta politico y e ekipo di FASE ora cu un parlamentario ora e presupuesto di 2020 cu a bin cu fondonan pa FASE inclui “bo no a bin cu ni un sugerencia, ba keda keto, ta manera un cos cu AVP ta hole sanger, AVP ta saboria sanger politico y nan ta bisa akinan nos por colga Glenbert, colga Xiomara y nos por kibra gobierno”, el a declara.

Un otro argumento cu minister Croes a trece dilanti cu e ta tuma na malo segun el a expresa ta ora cu el a tende di parlamentario Gerlien Croes cu ta papia over “boso a coy e placa di 12.6% di e trahadonan, 25% di e politiconan pa yuda den FASE” y cu nan a haci’e pa motibo cu den añanan anterior di gobierno di AVP “nan a desgracia cu debe y malgastamento di placa asina hopi cu nan no a laga reserva pa kisas den momentonan di pandemia por a usa en bes di touch e salario di trahado”.

Tambe el a lamenta loke Contraloria General a menciona den su rapport cu nan tabatin riesgo pa fraude y cu esey “lamentablemente ta crea un bida unda cu lamentablemente no tin motibo, pasobra tin erornan administrativo cu a wordo haci y tur ta wordo atendi”, el a comenta.

El a informa cu e fondonan di FASE tabata wordo maneha door di Directie Financien, departamento y ministerio di Finanzas, cu nan como departamento encarga y su persona como minister no tabatin acceso na maneho di fondonan y cu ora un aplicante pa FASE no tabatin cuenta di banco, su pago tabata tuma luga via departamentonan di Asuntonan Social pa motibo cu e departamento aki tin e forma con pa sigura cu un hende cu por ehemplo, ta cobra onderstand, cu no tin cuenta di banco, ta haya su onderstand. Door di esey nan a canalis’e via departamento di Asuntonan Social.

Ta p’esey e ta lamenta e declaracionnan di parlamentarionan di AVP contra FASE pasobra nan tin sed pa problemanan politico, manera minister Croes a sigura diaranson ultimo.