Minister di Labor, Glenbert Croes a reacciona contra Asociacion Gastronomico Aruba (AGA)/Aruba Food & Beverage Association (AFBA), caminda e mandatario a indica cu lo reuni cu nan e siman aki. Nan ta bay atende cu e preocupacion specifico di e asociacion aki
Sinembargo e kier bisa cu obviamente, e ta den total desacuerdo cu e declaracion haci den nomber di e asociacion aki. E ta haya “nan uso di palabranan hopi desafortuna,” el a bisa. P’esey el a dicidi di bin cu un comentario hopi breve pa “no daña asunto,” ya cu esey no ta su intencion.
El a expresa su disposicion pa yuda AGA/AFBA, y tambe cualkier otro gremio riba tur cos cu por bay bao su responsabilidad. E mandatario a bisa cu e ta compronde nan dolor y tambe nan desesperacion, y problemanan. Pero el a laga sa cu niun momento nan ta bari y sconde e problemanan bao tapijt. E no kier bay riba direccion politico, sino cu e kier atende e asunto aki cu obhetividad, el a expresa.
P’esey e no ta di acuerdo cu e tipo di expresion aki, ya cu si nan bari y sconde e problemanan aki bao di tapijt, esaki kiermen cu nan a sconde nan wowonan na e necesidad di nos comunidad. Mientras cu el a menciona un serie di ayudo financiero y alimenticio entre nan FASE, subsidio di salario, bijstad, alivio fiscal y tambe pakete di cuminda otorga via Cruz Cora cu ayudo di Hulanda of via Fundacion pa Nos Comunidad y otro fundacion na Aruba.
“Kiermen nos no a bari sconde problemanan bao tapijt na ningun momento,” el a declara.
Mas bien e ta argumenta cu nan a dicidi pa atende e desafio y problema cu e pandemia aki a presenta nos pais. No obstante nos situacion economico y financiero debi cu nos industria turistico a cay alrededor di casi un 70%. Tambe e caida aki tin su efecto pa gobierno su entrada, ya cu si no tabata pa e asistencia financiero di Hulanda, pais Aruba no por cumpli cu tur e compromisonan social pa tur hende sobrevivi.
Siman pasa, presidente saliente di AGA/AFBA, Sr. Jan van Nes pa medio di un carta abierto dirigi na Minister di Labor a yega di expresa su preocupacion den nomber di e asociacion aki. Den e carta, el a expone e retonan cu e asociacion aki ta confronta y cu el a yega di expresa den varios ocasion.
Pa e motibo ey, nan sector a pidi pa un dialogo urgente riba e topico di flexibilidad laboral y tambe pa un reunion di Tripartiet lo mas pronto posibel. Ya cu for di maart 2020 niun reunion a tuma luga cu minister di Labor.
Tampoco un reunion Tripartiet a wordo convoca. Aunke e peticion pa un reunion di Tripartiet ta bay bek pa dia 6 di october 2020 cu un agenda. Asina ta wordo cita den e carta abierto menciona.
