Bon Dia Aruba den edicion di dia 27 di augustus a publica un articulo tocante maneho nobo pa migrantenan na unda riba red social ciudadanonan a haci diferente cuestionamiento tocante esaki, ayera minister di Labor, Energia y Integracion den un conferencia di prensa a amplia un poco mas riba e topico aki.

Minister Croes a menciona cu den Handboek Toelating aproba na 2023 den conseho di minister tin cierto maneho di instruccion cu nan mester saca pa loke ta trata procedemento, entre otro, na unda nan a traha hunto cu diferente gremio manera AHATA, Comerciantenan Uni Aruba, ATIA, Camara di Comercio y cierto sindicatonan, vooral esnan den sector priva cu a haya nan participacion.

E mandatario a duna un conseho riba un di e instruccion di maneho cu nan a traha cu e gremionan pa loke ta trata alternative legal pathways cu a cuminsa door di e pandemia unda nan a bay wak unda nan por percura pa crea un pathway pa hendenan por a keda door di e ciere di frontera pa via di pandemia y wak con por duna un caminda pa migrantenan por bira legal.

“Claro, loke nos semper a enfoca riba dje ta cu mester a base di necesidad cu tin riba mercado laboral, mester tene na cuenta cu e maneho unda cu nos yiunan di tera mester ta prome cu bin na remarke pa haya un trabao,” minister Croes a sigura.

Pero loke a pidi, segun el a sigura, a raiz di e recuperacion economico cu Aruba a experiencia desde pandemia, adicional na esey tin hotelnan cu mester habri, e transformacion di e refineria unda lo bin diferente proyecto manera Eagle LNG “p’esey mes na e momentonan aki ora nos ta anunciando Enseñansa Pa Empleo na San Nicolas dirigi riba funcionnan tecnico, bo ta weita cu e demanda ta bay bin di eynan.”

Pa e motibo aki, nan ta enfoca riba e demanda laboral pa por termina e construccion di e hotelnan y un bes cu nan construccion lo finalisa, hotelnan ta bay habri y e ora ey mester bay yena e cuponan di trabao den e diferente hotel aki y industrianan riba zona energetico cu ta bay bin.

Minister Croes a detaya cu loke gremionan a pidi ta pa flexibilisa e rekisitonan di admision y haci nan un tiki mas facil.

E motibo di pakico e maneho nobo di admision aki no a bira publico door di e ministerio di Integracion ta pa motibo cu el a ser dirigi riba sector hotelero “pero eigenlijk e no ta corecto, no ta sector hotelero so ta pasando door di un desaroyo of un boom economico. Tur otro sector manera restaurantnan, boutiquenan, tur negoshi, pero tambe sector primario otro sectornan cu ta bay ta den auge, nan tambe ta bay tin mester di trahado capacita pa por yuda nan,” el a sigura.

Den cuadro di implementacion di e instruccionnan di politica aki, lo mester haci un distincion entre e categoria di “migrantenan ya presente” y “migrantenan nobo”, cu e fecha di yegada ta e criterio pa distingui entre e dos categorianan.

Segun e documento cu ta contene e maneho nobo aki, ta indica cu:
1 – Tur stranhero cu a drenta Aruba legalmente prome cu 1 di januari 2024 ta cay den e categoria di “migrante presente caba.” Esnan cu despues a drenta legalmente lo wordo clasifica como “inmigrantenan nobo.”

2 – Un migrante presente caba por, for di momento cu e ta biba legalmente na Aruba y ta den posesion di un permiso di estadia of di trabao, mesora entrega un peticion pa un permiso pa metanan di “Reunificacion Familiar”.

3 – Inmigrante presente caba cu a termina cursonan di por lo menos 12 siman den Enseñansa pa Empleo (EpE) cu exito, ta keda exonera di e test di mercado laboral.

Pa esaki, DIMAS ta bay consulta DPL den un periodo di dos siman segun minister Croes a señala pa e maneho di instruccion nobo aki.

Segun e criticanan cu nan ta hayando, minister Croes a bisa cu esaki no ta flexibel lo suficiente.

“Mi ta compronde esey, pero e hecho cu no ta flexibel suficiente, tambe ta pa un motibo. Nos kier bay paso a paso, pa bo no haciele flexibel demas. Pa bo no sacrifica e preferencia cu bo mester duna na bo yiunan di tera pa haya oportunidad di trabao den e demanda laboral,” minister Croes a bisa.

Tambe, minister Croes a haya critica for di oposicion pa loke ta trata trece migrantenan di afo pa traha na Aruba, pa esaki el a declara cu e alternative legal pathways ta duna preferencia na stranheronan cu ta fisicamente na Aruba caba, por lo cual, nan a sali for di e punto di bista cu “tur di nan, tin nan luga di biba caba.”

Nan ta poniendo como condicion na esun cu ta pidi pa trece trahado na Aruba sea contratista, empleado of compania, cu nan mester zorg pa un cas adecua.

“Nos ta den un situacion unda cu mester crea un herment den maneho pa sigura cu nos por cumpli cu demanda laboral pero toch di un forma cu, solamente un 4% di desempleo ta bisa cu tin mas di 2.000 ciudadano Arubiano cu ta sin trabao y nos kier pa tur di nan haya trabao, pero ta bay desafionan unda e 2.000 hende ey no ta bay haya trabao pero nos mester percura pa gran mayoria di nan haya trabao,” minister Croes a expresa.

Pa finalisa, el a informa cu e proceso di otorgamento di permiso ta bay tarda tres siman, despues e persona ta haya un pre-aprobacion y despues di esey tin seis siman pa termina e proceso na DIMAS.