“Mi a keda sumamente contento cu e reunion. Mi a gradici nan pa nan cooperacion y a reitera e apoyo, solidaridad humano pa e causanan cu nan ta sirbi como PADF.”
Diabierna ultimo, Minister di Integracion Glenbert Croes a ricibi e delegacion di Pan American Development Foundation (PADF), cu ta un stakeholder importante pa loke ta trata asuntonan di e comunidad stranhero na Aruba. E delegacion a bin pa presenta nan manager pa e programa di PADF local, cu ta den persona di Amy Richards hunto cu Raynel Martis cu ta regional director di PADF.
Minister Croes a expresa di ta contento di por a ricibi e delegacion, pa asina reitera e bon cooperacion cu Aruba tin cu PADF. Durante e reunion a toca e tema di flexibilisacion di permiso den cuadro di e maneho nobo cu Aruba a introduci desde 1 di Februari 2023 pa loke ta trata e comunidad stranhero. Aruba ta haciendo lo maximo pa mehora e proceso y lo revisa tur e sugerencianan cu PADF trece dilanti pa asina trece cambio na unda cu mester.
Minister Croes a indica cu Aruba no obstante e tamaño, tin un comunidad cu curason di oro. E maneho nobo di integracion ta cu si e mercado laboral tin un demanda pa cierto funcionnan y no tin hendenan local disponibel, lo duna cooperacion den facilita e proceso di permiso na esnan cu ta na Aruba fisicamente sin permiso.
“Mi a keda sumamente contento cu e reunion. Mi a gradici nan pa nan cooperacion y a reitera e apoyo, solidaridad humano pa e causanan cu nan ta sirbi como PADF.” Minister Croes a expresa.
