Minister di Infrastructura: “Tur sistema a funciona perfectamente”

Minister di Infrastructura, Sr. Benny Sevinger a expresa su satisfaccion riba e resultado di e trabou preventivo cu a wordo haci prome cu Matthew a cuminsa mustra su presencia na Aruba, ayera madruga.

E mandatario a declara na Bon Dia Aruba cu previo na e acontecimento di e fenomeno natural aki, el a realisa un analisis y inspeccion durante diahuebs henter dia, riba e rioleringnan y tur e sistema pa evalua awa via dam y via di lama.

Ayera mainta despues di e paso di Matthew, nan a constata cu e sistemanan aki a traha debidamente. Sinembargo e cantidad di awa cu nos a haya no tabata uno suficiente cu lo por ocasiona daño grandi. “Tur sistema a funciona perfectamente”, el a bisa.

Ayera durante dia e mandatario a bolbe haci un inspeccion pa evalua e dañonan cu e cantidad di awa cu Matthew a laga atras por a ocasiona pa cuminsa drecha nan. Na e momento ey, e no a descarta cu mas awa lo por a cay, y cu nan mester ta prepara pa atende cu cualkier eventualidad.

Dañonan riba beach

Minister Sevinger a laga sa cu awa bruto pazuid di nos isla a haci hopi daño riba nos costa, pero tambe banda pabou. Durante e proximo tres dianan nan lo sigui monitor e comportacion di lama cu lo keda bruto durante e proximo dianan.

Dialuna departamento di Infrastructura lo reuni pa mira y evalua e dañonan pa drecha nan na corto plaso. Tambe nan lo traha un rapport pa den termino largo purba di protege nos costa of beachnan.

El a anuncia cu nan ta trahando cu expertonan internacional pa traha un modelo pa traha un tipo di proteccion pa evita cu e tipo di fenomeno aki no lo sigui afecta parti di nos beachnan. Tambe nan a constata cu sushi cu lama mes a spula ta hopi, pero nan ta wardado cu e proceso aki pasa pa cuminsa opera pa haci limpi di biaha, ya cu nos beach ta parti di nos producto turistico cu ta un pilar di nos economia.

E ta spera cu pa fin di siman e situacion ocasiona pa Matthew lo normalisa pa cuminsa cu e accion di limpiesa di nos beachnan. E mandatario a bisa cu ainda no tin un inventarisacion riba e parti di nos costa cu mas a resulta afecta pa presencia di e fenomeno natural aki.