Ayera minister di Infrastructura, Otmar Oduber a informa cu a duna instruccion na director di Departamento di Infrastructura y Planificacion (DIP), Jaime Croes pa bin un investigacion interno relaciona cu un supuesto caso di corupcion den su departamento. Pero tambe pa haci un denuncia formal cerca Ministerio Publico (OM) pa un caso di posibel soborno of estafa.

Nan a dicidi di bin cu e investigacion aki despues di un denuncia publico haci pa dos ciudadano di fam Morales y Rodriguez, pa acto iregular cu supuestamente nan a confronta cu un persona di fam Corona, riba otorgamento di tereno pa construccion di cas cu a keda divulga riba rednan social.

Segun e mandatario, su ministerio ta distancia su mes totalmente di dicho acusacionnan y nan ta tuma e pasonan necesario pa subraya e integridad di e departamento di DIP. El a bisa categoricamente cu e ta para pa integridad di DIP.

Tambe a prohibi entrada di e persona envolvi den edificio di DIP, te ora cu e investigacion ta bin cla. E mandatario a enfatisa cu ningun di e personanan envolvi den e acusacionnan aki ta traha pa gobierno di Aruba y menos pa su ministerio y tampoco personalmente p’e. “No tin niun vinculo di trabou tampoco cu e personanan aki,” Oduber a bisa.

Investigacion
Igualmente el a laga sa cu tin varios investigacion cu ta tumando luga riba otorgamento di terenonan comercial, ya cu hopi negoshi ‘miyonario’ a wordo haci cu tereno cu ta propiedad di pais Aruba, durante e gobierno anterior. Di su banda el a laga sa cu den su maneho no ta tolera negoshinan cu tereno di gobierno.

E mandatario a mustra carta como evidencia cu ta trata di hendenan masha cerca mes di e minister anterior di Infrastructura, caminda tur cos relaciona cu otorgamento di tereno a wordo centralisa riba e persona aki. E tabata traha advies, te hasta logra cita cu e mandatario pa aproba e tereno, y despues e mesun persona tabata traha e acta pa bay notario pa esunnan cu nan kier a faborece. El a aclaria cu tur esaki a sosode cu e minister di Infrastructura anterior y no cune.

Den e caso aki, el a señala cu ex minister Sevinger a yega di pone ‘accord’ of aprobacion dos biaha riba e mesun carta pa un tereno specifico na Babijn. Pero niun di nan tabatin un number di registracion na DIP. El a bisa cu tin mas di 6 mil pa 7 mil ciudadano cu tin aprobacion di e minister anterior, pero niun di nan tin registracion. Tampoco niun procesamento a tuma luga pa e tereno solicita pa e tereno di fam Rodriguez. Igualmente el a laga sa cu na DIP no ta conoci cu e persona aki, ya cu e forma di procede aki ‘no ta tuma luga mas bou e gobierno aki, ni bou mi persona.’

Oduber a bisa cu desde cu el a asumi e cartera aki, tur peticion pa tereno sin excepcion ta tuma luga segun procedura di DIP, cu a keda anuncia for di mei 2018 y cu ta aparece publicamente den nan website. El a anuncia cu pronto lo wordo otorga tereno atendiendo cu e demanda di hopi aña pasa. Na final di luna aki lo otorga tereno a base di peticion haci desde 2007 te cu 2009 y prome cu fin di aña nan lo procesa e solicitud di aña 2010.

Otro investigacion tin di haber cu e kiosconan. Na principio tabatin basta discusion cu e kiosconan nobo na Welcome Plaza, caminda gobierno a gana tur caso, ya cu tabatin kiosco cu a wordo otorga despues di eleccion. Despues cu e situacion aki a wordo atendi cu e kiosconan di Welcome Plaza, nan ta ‘operando den un forma recto y corecto,’ el a bisa. Pero awor nan lo atende cu e otro kiosconan rond di Aruba