Durante un conferencia di prensa cu minister di Husticia, Andin Bikker a ofrece pa e medionan di comunicacion, el a papia tocante e menasa reciente cu e hefe di Warda Nos Costa, sra. Trudy Hassell, a ricibi di parti di un homber cu presuntamente ta Venezolano, y cu tabatin un arma di candela den su man. E menasa a aparece riba un video difundi riba rednan social.

El a manifesta cu na e mesun momento cu e noticia a ser conoci, a reuni cu KPA, VDA y NCTVI, e dienst cu a ser institui aña pasa, di cual un di su tareanan ta di protege e institutonan of personanan cu ta representa Aruba, den e caso aki Hassell, kende a haya un menasa.

Bikker a expresa cu nan como gobierno ta lamenta profundamente e situacion di e pais bisiña Venezuela, manera el a sigura, ta manteniendo un maneho rigido pa loke ta trata e mantencion di e ley di exclusion, pa motibo cu Aruba no por adopta e problemanan social for di otro pais, y mester mantene un maneho stricto.

Di mesun manera, Bikker a comenta cu ta existi personanan cu menos bon intencion, y den cuadro di criminalidad, aña pasa tabatin 33 atake cu mas di 14 persona cu tabata wordo sospecha di origen Venezolano, y den temporada di carnaval tambe tabatin personanan di e mesun nacionalidad cu a purba di kima e instituto coreccional.

Den e caso di e menasa pa Hassel, el a splica cu basicamente esey ta un crimen caba. Gobierno a tuma contacto cu autoridadnan di Venezuela pa wak si e persona cu a haci e menasa ta documenta, pa motibo cu el a haci un menasa serio, y di biaha a garantisa e siguridad di bida di Hassell.

“Esaki ta algo sumamente serio, basicamente e ta un menasa contra nos institutonan, y esey ta inaceptabel”, minister di Husticia a sigura.

Tambe el duna di conoce cu ayera, den oranan di atardi y durante henter dia di awe, lo bay tin un reunion cu Minister di Husticia di Hulanda, sr. Ferdinand Grapperhaus, y Staatsecretaris di Husticia di Hulanda sr. Mark Harbers, pa atende diferente tema pa loke ta trata e situacion di Venezuela, siguridad na e fronteranan, academia di ley, diferente tema di cooperacion conhunto y e creciente solicitud di asilo politico.

Pa e motibo aki, gobierno a haya diferente persona di Inmigration and Naturalisation Service (IND) pa haci training, pa asina gobierno por procesa e diferente peticion di asilo. El a splica cu añanan pasa, tabata trata di un peticion pa aña, y na e momentonan aki nan ta haya centenar di peticion, cu mester ta procesa, y pa haci esey nan mester persona capacita den e ambito ey.

Bikker a bisa cu nan a delinea un maneho pa procesa e solicitudnan a base di hurisprudencia internacional, nan ta wak e persona tin merito of no, y asina por tuma e decision final.