Den un carta dirigi na e presidente di Sindicato di Polis Aruba (SPA), Sr. Rodney Solognier, data 22 di januari 2023, Minister di Husticia, Rocco Tjon, a reacciona ariba e comunicado di prensa recien di SPA caminda ta vocifera nan malcontento ariba diferente punto y ta pidi atencion di minister pa soluciona esakinan.

Minister Tjon den su respuesta a elabora ariba shete punto cu sindicato SPA a trece pa dilanti den nan comunicado pa, segun minister, rectifica y brinda informacion corecto ariba e puntonan aki.

E prome punto cu Minister Tjon a elabora riba dje ta reduccion di salario. Riba esaki minister a informa cu conforme palabracion cu Gobierno di Reino, e tema aki lo wordo trata den e proximo Conseho di Minister dia 27 di januari.

El a agrega cu ya caba gobierno ta haciendo e preparacionnan pa paga e subsidio completo di vakantie, esta vakantieuitkering, na tur funcionario den luna di juni, como tambe e primanan completo den augustus y november.

El a splica cu conforme e marco legal, e eliminacion di e recorte di 50% di e vakantieuitkering y primanan a keda formalisa cuminsando dia 1 di januari 2023 y e reserva di impuesto salarial ariba e vakantieuitkering 2023 tambe a drenta na vigor ariba e mesun fecha. Pero esaki ta trece cune cu pa e proximo seis luna, lo retene un poco mas di loonbelasting pa por paga e vakantieuitkering completo.

Otro punto cu e sindicato a referi na dje den nan comunicado ta e politica di enfermedad. Minister Tjon a señala cu e politica actual di enfermedad ta bay back na añanan 90, pero durante añanan varios cambio a wordo realisa pa cu e forma con ta gestiona e politica aki.

El a aclaria cu na 2015, ex-Minister di Finanzas e tempo ey, Sr. Bermudez, ta esun a cu anuncia e cambionan pa e politica aki y a accentua cu e politica aki no a wordo introduci door di su persona.

El a agrega cu na final di aña pasa, su persona a reuni cu e presidente di SPA y DRH pa discuti e promocion di algun agentenan policial, pero un cantidad halto di ausente a perhudica e promocionnan aki.

Pa loke ta trata e situacion di schimmel na e wardanan di polis di San Nicolas y Playa cu KPA ta lidiando cune, Minister Tjon a indica cu ya caba a discuti e tema aki y a yega na acuerdonan pa por evita e problemanan aki.

El a remarca cu pa e motibo ey mes, limpiesa regular door di e un compania specialisa ta hopi importante y el a agrega cu nan a tuma medida, a haci estudio y a publica un rapport independiente cu tur e resultadonan. Den e rapport aki a keda determina cu no tin schimmel manera nan ta indica.

Na mesun momento, Minister Tjon ta haci yamada na e presidente di SPA pa nan traha riba un solucion den conhunto y si den caso cu e agentenan policial lo desea di bandona e edificio y busca otro edificio adecua, nan lo por haci esaki y lo conta cu e minister su cooperacion.

Referiendo na e indicacion di SPA caminata ta menciona cu e situacion aki tin algun aña caba ta sosodiendo na Warda di Polis Oranjestad, e Minister di Husticia a recorda cu e edificio na Wilhelminatrsaat 31-33, a wordo gehuur durante Gabinete Eman II (augustus 2015).

Pero recientemente, na momento di extende e contract di huur, mirando e diferente desaroyonan y puntonan di atencion, e minister a subraya cu e tabatin un periodo di notificacion mas cortico inclui. Esaki mas tabata pa duna KPA e oportunidad di cambia di edificio si asina nan tabata desea. Esaki no tabata e caso anteriormente.

El a enfatisa cu manera el a informa caba na e lidernan di Cuerpo Policial, e ta buscando otro edificio adecua, pero na mesun momento e ta wardando tambe pa e lidernan di Cuerpo Policial y sindicato SPA presenta un propuesta concreto.

Den su carta, Minister Tjon ta reacciona ariba otro puntonan cu e sindicato a trece a pa dilanti. Den nos siguiente edicion lo elabora ariba esakinan.