Mediante un comunicado riba su rednan social, minister di Husticia y Asuntonan Social, Rocco Tjon a expresa cu migrantenan cu ta purba drenta Aruba di manera ilegal cu boto, no ta haya asilo. Ademas, e minister a pidi pa por fabor no tuma e decision di haci esaki, cu por caba cu consecuencianan fatal.
Ayera mainta den oranan di marduga, Cuerpo Policial conhuntamente cu Kustwacth a tuma nota di un boto biniendo den direccion Aruba, mesora e ‘Metal Shark’ di Kustwacht cu asistencia di Cuerpo Policial di Aruba (KPA) su helicopter, a dirigi nan mes pa asina intercepta e boto aki.
Ta trata di 11 hende homber Venezolano y un hende homber Colombiano (12 persona total). Tambe abordo di e lancha a tuma nota di diferente pakete, cu mas di 600 kilo di substancia cual ta bou investigacion. E 12 personanan a ser entrega na KPA y e lancha cu nan a nabega riba dje a sink eventualmente.
Un tremendo trabou di parti di Kustwacht, Cuerpo Policial y demas departamentonan di e strategisch grensoverleg.
Na mes momento, minister Tjon a anuncia cu e di cuater (4) radar a yega Aruba, y lo wordo instala na inicio di aña 2024. “Importante pa menciona ta cu pais Aruba lo no otorga ningun tipo di asilo na e personanan aki cu a purba di drenta Aruba na un manera ilicito,” a menciona.
Ademas ta enfatisa cu “Ministerio di Husticia y Asuntonan Social kier pone enfasis riba cada ken cu tin intencion pa drenta Aruba na un manera ilicito, pa por fabor no haci esaki, pasobra bo lo sali perhudica. E ta di riesgo halto y sumamente peligroso cu consecuencianan fatal, y si logra drenta Aruba, bo lo wordo deporta bek sin oportunidad di asilo.”
Alabes, a bisa cu pais Aruba ta inverti hopi den tecnologia, personal y e strategisch grensoverleg. Manera ta conoci e groeifonds pa cu esaki a keda aproba, como tal lo bay inverti aun mas pa asina fortifica mas e siguridad na frontera.
