Durante un conferencia di prensa ayera mainta, minister di Husticia y Asuntonan Social, Rocco Tjon a anuncia varios proyecto cu ta bay cuminsa tuma luga na instituto coreccional KIA, cu ta bay tin un inversion di 1.5 miyon florin.

Tjon a señala cu ora ta trata di un instituto coreccional, e maneho ta hopi ‘straight forward’ pa motibo cu internacionalmente ta examina riba diferente aspectonan, loke tambe ta nifica cu e maneho ta delinea riba e aspectonan aki.

Un di nan ta riba e parti di seguridad y higiena, otro ta atencion medico cu por wordo brinda na tur esnan cu ta cera den KIA. Pero tambe e programanan cu ta duna na e detenidonan, “pasobra na final di dia bo kier percura pa nan por reintegra y resocialisa back di un manera exitoso”, Tjon a sigura.

Igualmente el a menciona cu den esaki ta hopi importante e organisacion como tal, pa motibo cu e procesonan y structura di organisacion ta haci posibel pa por atende tur e diferente aspectonan aki. Tjon a expresa cu esaki ta bin dilanti door di preguntanan cu prensa a haci tocante ki intencion tin pa KIA, unda cu Tjon a splica cu den e prome tres luna ya caba nan a aloca 1.5 miyon florin pa inversionnan cu mester tuma luga na KIA. Ademas el a haya lamentabel cu e informacion aki no tur ora ta yega na esnan cu ta traha na KIA, pero e kier sigura cu nan si tin atencion.

E suma aki ta specificamente pa atende cu diferente aspecto, unda cu el a expresa cu e parti di higiena y seguridad ta importante. Den esaki el a papia di e combi WC pa e salanan di recreacion di KIA, loke ta causa hopi molester y consecuentemente e ta afecta e parti di seguridad. Pa loke ta e parti di infrastructura tambe algun renobacion ta bay tuma luga den e diferente departamento. Ta bay reemplasa sluisdeuren y nan ta bay introduci un elektronish sleutelbeheer systeem, cu ta bay percura pa eleva seguridad y tambe ta sigura e parti di trahadonan, cu ta bay por evita cu por ehemplo, un trahado por bay cu un yabi na cas cu por trece consecuencianan – y nan no ta bay tin manera di cana cu yabi mas.

Esaki ta proyectonan specifico cu a ser presupuesta caba. E fondonan aki t’ey pa motibo cu ta fondonan cu aña pasa a keda aloca pa tur e diferente proyectonan aki, y unabes cu presupuesto 2022 ta keda aproba, atrobe ta bay tin un suma disponibel pa por sigui inverti den e instituto coreccional aki.

Otro pregunta cu tambe ta bin dilanti – manera Tjon a expresa – ta kico ta wordo haci pa e detenidonan, pa di e forma ey di berdad por percura pa nan por reintegra y resocialisa back. Tjon a manifesta cu tin diferente programanan andando na e momentonan aki y hopi di nan ta toca e parti di deporte. Pero tambe na fin di maart nan ta bay lansa un proyecto nobo, caminda cu ta bay introduci den jeugdafdeling un ‘smart classroom’ unda cu ta bay duna e oportunidad na e hobennan aki pa nan por sigui nan lesnan a traves di un plataforma e-Learning.

Igualmente, Tjon a declara cu na luna di maart tambe nan ta bay cera un convenio cu fundacion Enseñansa pa Aruba, pa di e forma ey nan por garantisa cu structuralmente tin cursonan cu ta brinda na e detenidonan, loke ta nifica cu nan no ta depende mas di un docente specifico. Aunke e docentenan na KIA ta keda haci nan trabaonan “pero mi ta kere si bo cera un convenio di e forma aki, bo por garantisa mas curso y mas tayer pa nos detenidonan”, Tjon a sigura.

Pa cuminsa, nan ta bay inicia cu e parti di lassen, uitdeuken en spuiten y metselen na unda cu Tjon a bisa cu ta ofrece esaki a base di analisis cu ta haci den KIA mes door di e trahadonan, pa wak kico ta e interes y e capacidad di e detenidonan, pa asina nan por sa cu e detenidonan ta bay participa den loke ta ofrece nan.

Tambe Tjon a comenta cu ora ta trata di un instituto coreccional, mester evalua e posibilidad

pa un detenido por traha den KIA mes, unda tin diferente trabaonan cu e detenidonan por haci. Y “como instituto coreccional bo mester haci esaki posibel tambe”, el a afirma.

Na e momentonan aki, KIA tin 141 detenido cu tin un trabao den KIA y esaki ta un parti di henter un proceso di percura pa nan por reintegra back den sociedad.

Pa loke ta trata reorganisacion na KIA, Tjon a conta cu esey ta den su fase final. E plaatsingsprocedure a tuma luga y tur personal a haya e oportunidad pa entrega nan keho, si nan tabatin un, a base di e plaatsingsprocedure. Y aworaki ta haci e ultimo analisis pa tur e diferente kehonan cu a wordo entrega door di e comision independiente cu ta analisa esaki. Unabes cu esey ta cla prome cu fin di luna ta bay acerca sindicatonan tambe pa den e caso aki nan por bay rond af henter e proceso di reorganisacion.

Igualmente Tjon a expresa cu esakinan ta inversionnan a termino corto y largo. Tocante termino corto el a bisa cu esaki ta necesario, pa motibo cu realidad ta cu si ta bay scoge mes pa bin cu un instituto nobo, mester atende cu locual ta sucediendo aworaki. Y pa loke ta trata termino largo, tabatin un request for expression of interest, cu ya caba a tuma luga. Companianan internacional y local a mustra interes, pero obviamente e ta hopi costoso. “Esaki ta algo cu nos ta deliberando aworaki cu Hulanda pa wak si nan tambe ta dispuesto pa yuda financia e proyecto aki, dado cu topico aki ta hopi importante pa Hulanda tambe y vooral ora no por garantisa derechonan humano, cu na final di dia ta toca Reino”, Tjon a finalisa.