Un peticion den cuadro di transparencia a base di e Landsverordening Openbaarheid van Bestuur (LOB) cu a wordo entrega riba 16 di mei 2019, a haya contesta te 14 di november 2020, 18 luna despues cu e peticion a wordo manda na minister di Husticia. No a honra nada di loke a pidi den e peticion, y a ignora e peticion te cu no tabata posibel mas.

A base di e ley di LOB, cualkier persona tin e derecho di pidi un instancia di gobierno cu ta cay bao un minister of un minister mes pa haci cierto documentonan publico, den interes di transparencia di e maneho y operacion di gobierno. E instancia di gobierno of e minister mester contesta e peticion aki den 3 siman, y si esey no ta posibel, e minister lo mester indica cu no ta posibel pa contesta e peticion den 3 siman, y por prolonga e termino aki 1 biaha mas, pa un total di 6 siman pa duna contesta.

No ta duna transparencia riba gastonan pa detencion, acuerdo cu Calloway y asilo otorga
E terminonan aki sinembargo, den un LOB cu periodista di Bon Dia Aruba a entrega cerca minister di Husticia, no a wordo respeta. E peticion di transparencia tabata encera haya informacion riba e gastonan diario pa detencion di personanan stranhero na Guarda Nos Costa na aeropuerto y huis van bewaring na Dakota. Banda di esey, a pidi tambe pa por duna e documentonan di e acuerdonan cu tin cu aerolineanan y tambe Calloway, cu ta suministra cuminda na e detenidonan.

Mas aleu, tambe a pidi pa haya documentonan di decisionnan pa otorga peticionnan di asilo, mirando cu minister di Husticia a yega di indica cu solamente 3% di peticionnan cu ta wordo haci pa asilo, ta wordo otorga.

18 luna pa duna contesta y ta ignora orden di hues

Ta remarcabel cu durante e proceso, cual en total a dura 18 luna, pues 1 aña y mey, minister di Husticia a dicidi di ignora varios peticion pa contesta e peticion di LOB entrega originalmente na mei di 2019. Despues cu no a ricibi un contesta den 3 siman, y tampoco un notificacion cu e peticion lo tuma mas tempo y cu lo extende pa 6 siman, a entrega un obhecion (bezwaar) den e termino prescribi pa e Landsverordening Administratieve Rechtspraak (LAR).

Sinembargo minister di Husticia a nenga pa contesta e obhecion aki tambe, y na momento cu no a contesta e obhecion, a dicidi despues di 6 siman pa asina entrega un obhecion un bes mas, pero e biaha aki dirigiendo esaki (beroep) na Corte. Despues di algun tempo cu e pandemia di Covid-19 a yega Aruba y tur instancia gubernamental a cera, e peticion a keda keto.

Eventualmente, despues cu servicionan di gobierno a habri back, Corte a dicidi pa duna minister di Husticia un oportunidad pa entrega su defensa por escrito contra e beroep. E minister a dicidi di no haci uso di esaki, y eventualmente hues a dicidi cu e bezwaar y e beroep ta admisibel y cu minister di Husticia ta obliga di contesta e peticion di LOB denter di 3 luna despues di e hues su decision.

Sinembargo, minister di Husticia a nenga di contesta esaki unabes mas, y na e momento ey e periodista a dicidi pa entrega un peticion di articulo 53 di LAR, pa asina exigi pa e minister cumpli cu e orden di hues. Si e minister no cumpli cu esaki, e ora ey gobierno mester paga un suma (normalmente entre 250 pa 500 florin) pa cada dia cu no cumpli cu esaki.

Na e ultimo momento posibel, despues di un temporada largo di ignora varios carta y orden di hues, e periodista a haya un carta di Departamento di Integracion, Maneho y Admision di Stranhero (DIMAS) unda ta indica cu riba niun di e puntonan ta bay honra e peticion di transparencia, cu un splicacion breve.

Pues e minister a dicidi pa no honra e peticion di ningun manera, ignora esaki te cu e persona mes lo lubida, y ora a cana tur caminda y finalmente e minister mester a duna contesta cu peliger cu e lo costa gobierno placa, a skirbi un simpel carta bisando cu no lo por honra e peticion.