E cantidad di atraconan den e ultimo simannan atrobe a bira un discusion politico unda por mira awor cu e malcontento tambe ta reino awor den e fraccion di partido den gobierno, AVP. Awe minister di Husticia Arthur Dowers mester responsabilisa su mes den parlamento riba su maneho.
Esaki no ta e prome biaha. Diferente biaha durante mando como minister di Husticia sr. Dowers (casi ocho aña) ta bou critica fuerte. Oposicion ta haya cu e mandatario no ta haci suficiente pa combati criminalidad. Aña pasa entre 700 pa mil hende a participa den un manifestacion contra criminalidad unda e organisadonan a exigi di gobierno pa entre otro pone mas placa disponibel. Gobierno a priminti di inverti 10 miyon florin extra den combatimento di criminalidad y tambe pa cuerpo policial asina por pone mas polis riba caya.
Sinembargo un poco siman pasa Bon Dia Aruba a papia cu un di e organisadonan y e ta comenta cu e ta basta desapunta cu gobierno como cu nan no ta tene nan mes na e promesanan.
Malcontento den AVP
Diasabra e parlamentario Clarisca Velasquez (AVP) a manda un relato pa prensa indicando cu e no ta contento cu e maneho riba husticia e ultimo tempo. Hasta el a indica cu el a bisa minister Dowers cu ‘si no cambia su maneho lo kita su sosten’. Aunke cu e parlamentario ta haya cu e gobierno actual ta esun cu a inverti mas den husticia. Sinembargo nan no ta haci suficiente na nos fronteranan pa hende indesea ta drenta.
“Hendenan na cabes di departamento clave pa nos por preveni y combati criminalidad no ta demostra integridad pa por ta na cabes di departamentonan cu mester tin hendenan cu ta ehempel di integridad.” Tambe e ta bisa cu ta falta mas material ainda na cuerpo policial, entre otro auto. “E districtonan tur falta auto pa core patruya y esaki ta inaceptabel.” E ta haya e ora cu e prioridadnan ta robes den mando di e cuerpo. Segun e parlamentario di AVP e Ministerio Publico tambe ta ‘culpabel’ cu maneho robes pa cu ristamento di hende riba droga y arma. Segun e, e maneho preventivo aki ‘no ta traha’.
