Parlamentario Rocco Tjon ta urgi Minister di Husticia, Andin Bikker pa bin cla cu e Plan di Formacion pa trahadonan di KIA. “Nos lo haci un apelacion na Minister di Husticia pa mas lihe posibel e Plan di Formacion di nos instituto coreccional aworaki keda cla,” Parlamentario Tjon a bisa
El a formula e solicitud aki unabes cu a wordo conoci fin di siman, cu otro preso a huy for di KIA. Pero e no kier relaciona e situacion aki como un causa cu dos fugitivo peligroso den un luna a huy di KIA. Sinembargo, Parlamentario Tjon ta considera obvio cu si structura of Plan di Formacion di KIA no ta full implementa, e lo tin consecuencianan pa full e funcionamento di e instituto coreccional aki.
Ex Director di KIA y Parlamentario Tjon, ta haya cu no mester señala e Minister di Husticia como esun responsabel cu e Plan di Formacion no ta cla na KIA, ya cu e ta un proceso cu tin hopi aña andando. “Esey no ta e mensahe cu nos kier manda,” el a bisa. Pero si e ta considera cu pa husticia den general, pero specificamente pa KIA, ta sumamente importante pa e Plan di Formacio por keda cla aworaki.
El a bisa cu na 2017, tempo cu e tabata director di KIA, a yega di culmina e proceso a base di cantidad di reunion hunto cu e sindicatonan, pero tambe cu personal, Departamento di Recurso Humano (DRH). Te hasta nan a yega na e palabracion cu lo evalua e Plan di Formacion despues di tanto tempo. Pero tambe cu nan lo cuminsa yena e funcionnan nobo. Pero e proceso aki no a caba di tuma luga.
Nos ta dos aña hopi mas leu cu e Plan di Formacion, y ainda e no ta cla. Mientras cu e ta considera hopi necesario pa bin cla cune y ehecute aworaki. Despues cu e ta wordo implementa nan por bin cu cambionan si tin mester, pero despues di un evaluacion.
