Durante su bishita na Aruba minister di Husticia y Seguridad Hulandes, David van Weel a realisa un bishita na Wardanan di Polis. Den su declaracion na e noticiero local Noticia Cla el a expresa con e bishitanan aki a bay.
El a remarca cu e Cuerpo ta hopi profeshonal y a alabes a menciona e hecho cu Aruba a ser nombra e isla mas sigur den Caribe. “Esey absolutamente tin di haber cu e bon trabao cu e Cuerpo ta haci akinan,” el a sigura.
El a sigui splica cu e Cuerpo Policial ta traha cu innovacion, ta wak kico ta e tendencianan den criminalidad y ta ta traha riba e parti social y e hecho cu nan ta presente den bario, mescla cu e poblacion. Y pa loke ta e radar, el a bisa cu e ta uno hopi impenetrabel na tur banda.
E portal a puntra e mandatario tocante e scarsedad di personal cu Cuerpo Policial tin na e momentonan y si ta algo cu Hulanda por yuda Aruba cune. Minister van Weel a indica cu e ta algo cu nan lo tene cuenta cune sigur. El a referi tambe e reunion cu ta ser realisa cada seis luna cu ta conta cu presencia di su persona y tambe e ministernan di Husticia di Aruba, Corsou y Sint Maarten.
Esaki mester a tuma luga pronto tabata e motibo original cu el a bishita e isla, lamentablemente, esey no a sucede awor pa motibo di e eleccionnan aki y e formacion di gobierno cual ainda no ta finalisa y ta den proceso ainda. El a indica cu e lo bolbe den luna di juni y lo tin un reunion asina anto y lo trata topiconan manera kico por siña di otro, kico mester haci, unda e scarsedadnan ta y kico por haci pa cu esaki.
Kropschef di KPA sr. Ramon Arnhem tambe a duna un declaracion na e noticiero den cual el a indica e encuentro a bay bon y cu minister di Husticia ta un persona cu ta para cu tur dos pia na tera y ta un persona cu tin experiencia den e ambito di husticia.
“Esey ta haci’e mas facil pa conecta di tur manera, specialmente den organisacionnan operacional. Nos tabatin un combersacion agradabel di berdad. Mi tin tur confiansa den bon cooperacion,” Arnhem a indica.
