Den un crisis di seguridad, minister di husticia di Brasil, Torquato Jardim, a bisa cu gobierno di Rio di Janiero no tin ningun control riba nan polis militar y el a denuncia un vinculo entre comandantenan di polis cu crimen organisa, medio di comunicacion local a informa.

E comentario explosivo di e ministro a ser ofreci na un blog di e portal Brasileño UOL, y a causa un scandal na Rio di Janeiro, ciudad cu ta bibando den un situacion di violencia cu a costa miles di bida humano den ultimo lunanan.

“Nos a papia fuerte, tanto ami so, como Raul Jungmann (ministro di Defensa) y Sérgio Etchengoyen (ministro di Gabinete di Seguridad Institucional), hunto cu secretario di seguridad di estado y e gobernador. Nan no tin mando,” e ministro a bisa di polis militar.

Segun e ministro, cu e hefenan principal di narcotrafico den prison, crimen organisa ta traha di manera horizontal y ta mas dificil pa controla.

“Anto awor e comandantenan di batayon ta haya mas influencia, nan no tin hefe pa controla. Cada un di nan ta doño di un faccion. Awor e comandantenan ta socio di crimen organisa na Rio,” e ministro a bisa segun publicacion di UOL. Segun e funcionario aki, e crisis di seguridad cu ta perhudica Rio lo por keda soluciona na aña 2019, cu un gobernador of presidente nobo.

“Cu actual gobierno di Rio, e no lo ta posibel”, el a bisa.

E declaracion di e ministro a cay manera awa friu riba gobernador Luiz Fernando Pezão, cu a bisa cu ni gobierno di Rio y tampoco polis militar ta haci negoshi cu grupo di crimen organisa.

E ola di violencia a converti Rio di Janeiro den un di e estadonan mas insigur na Brasil. Brasil aña pasa a registra mas di 61.600 asesinato, siete pa cada ora, y ta un cantidad ekivalente na tur victima di e bom atomico cu a cay riba Nagasaki na 1945.