Un topico cu tur ora ta wordo divulga den media di comunidad ta e parti di insiguridad producto di casonan di criminalidad, atraconan y kiebro na ordo di dia cu ta afecta nos comunidad.
Ayera minister di Husticia, sr. Arthur Dowers a bisa na Bon Dia Aruba cu e problematica aki ta afecta no solamente pais Aruba, sino hopi pais den nos region caminda ta wordo refleha un aumento di insiguridad, crimen y atraco haciendo uzo di arma.
E mandatario a bisa cu nan ta actuando hopi duro den e aspecto represivo. Tambe riba e aspecto preventivo nan ta haciendo esfuerso hopi grandi. El a indica cu e no por divulga tur loke nan ta haciendo den e esfera preventivo. Te hasta hopi bes nan ta preveni cu personanan mal intencion ta comete nan acto criminal of atraco. Un aspecto di parti preventivo –segun e mandatario- tin di haber cu nos autoridadnan a yega di frustra e antisocialnan nan posibilidad di comete cualkier crimen.
Atencion di nos autoridadnan
E mandatario a declara cu e casonan di criminalidad aki tin nan debido atencion maximo di nos sistema di husticia y nos cuerpo policial. E ta haya cu nos pais tin un resultado “sumamente bon” pa loke ta trata solucion di crimen. “Cada rato cu ta sosode un crimen, nos ta hopi lihe y despues ta bay over na detencion di e persona cu a comete e crimen”, el a laga sa.
Sinembargo e mandatario ta haya cu mester haci un separacion pa loke ta trata e fenomeno aki, ya cu nos tin hopi crimen cu ta pasa no solamente na Aruba sino na mundo, cu no tur dia ta capta atencion di hende. El a enfatisa cu nos tin un Ministerio Publico y cuerpo policial cu ta ocupa nan mes pa atende cu tur e tipo di crimen aki. Pues e ta haya cu loke ta divulga den media logicamente ta e crimen nan cu ta hala mas atencion of tin sensacion y cu sigur tin su impacto riba hende.
Pero nos mester realisa cu nos tin un aparato hudicial y policial cu ta traha riba tur tereno di crimen. Actualmente nos ta confronta un crimen cu ta bin di afo di nos pais entre nan esun cu ta trafica cu arma, y tin crimen cu ta sosode den nos pais. “Cu sigur tin hende cu ta uza arma di berdad of arma falso cu ta parce di berdad y cu ta pone hopi spanto den un hende pa kita su pertenencianan”, el a bisa.
